කසළවලින් විදුලිය උත්පාදනය ඇරඹේ

(කොළඹ, ලංකාපුවත්) – කසළවලින් විදුලිය උපදවන ශී‍්‍ර ලංකාවේ ප‍්‍රථම ව්‍යාපෘති දෙකෙහි ඉදිකිරීම් ආරම්භ කිරීම ජනාධිපති මෛතී‍්‍රපාල සිරිසේන මැතිතුමාගේ ප‍්‍රධානත්වයෙන් අද (10) කෙරවලපිටියේදී සිදුවිය.

කසළ නිසි ලෙස බැහැර නොකිරීම හේතුවෙන් පසුගිය කාලය තුළ ගැටලු රැසකට මුහුණදීමට සිදුවූ අතර ඒ සඳහා ස්ථිරසාර විසඳුමක් ලෙස මෙම ව්‍යාපෘතින් කි‍්‍රයාත්මක කෙරේ.

කසළ සම්පතක් කර ගනිමින් විකල්ප ක්ෂේත‍්‍ර සඳහා යොමු වීම මෙතෙක් ශී‍්‍ර ලංකාව තුළ සිදු නොවූ අතර කසළ කළමනාකරණය සඳහා දියුණු රටවල භාවිත කරන තාක්ෂණික ක‍්‍රමවේද හා මෙවලම් භාවිතයට ගනිමින් සනීපාරක්ෂක සහ පරිසර හිතකාමී ලෙස අවසන් බැහැරලීමේ ක‍්‍රමවේදයක් ස්ථාපිත කිරීමත් ඒ අතරතුර කසළවලින් ගත හැකි ප‍්‍රයෝජන ලබා ගැනීම සඳහාත් විධිමත් වැඩසටහනක් මහානගර සහ බස්නාහිර සංවර්ධන අමාත්‍යංශය විසින් කි‍්‍රයාවට නංවා තිබේ.

ඒ යටතේ වත්තල, කෙරවළපිටිය ප‍්‍රදේශයේ සිදුකෙරෙන මෙම ව්‍යාපෘති සඳහා KCHT ලංකා ජෑන්ග් ආයතනය හා වෙස්ටර්න් පවර් ආයතනය රුපියල් බිලියන 27 ක ආයෝජනයක් සිදු කර තිබේ.

මෙම ව්‍යාපෘතිය ආරම්භ කිරීමත් සමග එක් බලාගාරයකින් මෙගාවොට් 10 ක විදුලිබල ධාරිතාවක් ජාතික විදුලි බල පද්ධතියට එක් කිරීමට නියමිත අතර මීට සමගාමීව පුත්තලම, අරුවක්කාලු ප‍්‍රදේශයේ සනීපාරක්ෂක කසළ රැඳවුම් මධ්‍යස්ථානයක් ද ස්ථාපිත කෙරේ.

ඉදිරි වසර දෙක තුළ මෙම සියලු ඉදිකිරීම් අවසන් කිරීමට නියමිතය.

අමාත්‍යවරුන් වන පාඨලී චම්පික රණවක, ජෝන් අමරතුංග, රංජිත් සියඹලාපිටිය, නියෝජ්‍ය අමාත්‍ය ලසන්ත අලගියවන්න, බස්නාහිර පළාත් ප‍්‍රධාන අමාත්‍ය ඉසුර දේවපි‍්‍රය, නිමල් ලන්සා යන මහත්වරුන් ඇතුළු ප‍්‍රදේශයේ දේශපාලන නියෝජිතයින්ද, මහනගර හා බස්නාහිර සංවර්ධන අමාත්‍යාංශයේ ලේකම් නිහාල් රූපසිංහ, නාගරික සංවර්ධන අධිකාරියේ සභාපති ආචාර්ය ජගත් මුණසිංහ යන මහත්වරුන් ඇතුළු පිරිසක් මෙම අවස්ථාවට එක්ව සිටියහ.

 

Leave a Reply

Your email address will not be published. Required fields are marked *

9 + 15 =