චන්දිමාල් අමිහිරි පරාජයේ වගකීම භාර ගනියි

(කොළඹ, ලංකාපුවත්) – ශ්‍රී ලංකාව හා ඉන්දියාව අතර පැවති තෙවන හා අවසන් ටෙස්ට් තරඟයෙන් පසුව ඊයේ (14) පැවැති මාධ්‍ය හමුවේදී ටෙස්ට් කණ්ඩායමේ නායක දිනේෂ් චන්දිමාල් කියා සිටියේ තමා සහභාගි වූ තරගාවලිවලදී ලද දරුණුතම පරාජය මෙය බවයි.

නායකයකු ලෙස තමන් පරාජයේ වගකීම භාර ගන්නා බවද ඔහු කියා සිටි අතර කණ්‌ඩායමක් ලෙස ඉදිරියේදී නැගී සිටීම අරමුණ බවත් පියවරෙන් පියවර ඉදිරියට යෑමට ඉදිරියේදී සිදුවන බවත් දිනේෂ් චන්දිමාල් එහිදී පෙන්වාදී ඇත.

“මම ක්‍රීඩා කරපු තරගාවලි පරාජයට පත්වෙලා තියෙනවා. අපි දකුණු අප්‍රිකාවේදීත් 3-0 කට පරාජය වුණා. නමුත් අපේ රටේ ගහද්දී අපිට ටෙස්‌ට්‌ තරග තුනේදීම දින පහක්‌ ගහන්න බැරි වුණා. මේ තරගය දින දෙකහමාරකින් විතර ඉවර වුණා. කිසිවකුට නිදහසට කාරණා කියන්න දෙයක්‌ නැහැ. මගේ ක්‍රිකට්‌ දිවියේ ලබපු දරුණුම පරාජය තමයි මේක.”

“පැරදුනාම එක එක දේවල් කියල වැඩක්‌ නැහැ.මම කවදාවත් ක්‍රීඩකයකු වශයෙන් සහ නායකයකු වශයෙන් කණ්‌ඩායම අමාරු වෙලාවේදි දාලා යන කෙනෙක්‌ නෙමෙයි. අපිට හදාගන්න තියෙන දේවල් තියෙනවා. මම විශ්වාස කරනවා මේ කණ්‌ඩායම ඉදිරියේදී නැගී සිටින බව. ඒක එකපාරටම කරන්න පුළුවන් දෙයක්‌ නෙමෙයි. හිමිහිට පියවරෙන් පියවර තමයි ඉදිරියට යන්න තියෙන්නෙ.”

“මේ කණ්‌ඩායම අපි හැමදෙනාම තෝරල ගත්තු තීරණයක්‌. පුහුණුවීම්වලදී හැමදෙනාම ඉතාමත් උනන්දුවෙන් මහන්සියෙන් පුහුණුවීම් කරනවා. නමුත් මැදට ගිහිල්ල හරිදේ කරන්න බැරි වුණා. නායකයකු ලෙස මම පරාජයේ වගකීම භාර ගන්නවා. ඒ වගේම මේ පරාජයන් ගැන අපේ ක්‍රිකට්‌ රසිකයන් හැමදෙනාටම මම කනගාටුවත් ප්‍රකාශ කරනවා.”

“මගේ මොකක්‌ හෝ අඩුපාඩුවක්‌ නිසා මාව සිම්බාබ්වේ සමග පැවැති එක්‌ දින තරගාවලියේදී තෝර ගත්තෙ නැහැ. හැබැයි මගේ ප්‍රහාරාත්මක වේගයේ අඩුපාඩුවක්‌ තියෙනව කියල කවුරු හරි කියනවනම් මම දැන් ඒ දේවල් නිවැරදි කරගෙන තියෙන්නෙ. ප්‍රහාරාත්මක වේගය අඩු වුණා නම් ඒකට හේතුවක්‌ තිබුණා. අනිත් පැත්තෙ පිතිකරුවන් දැවී යන විට මට කඩුල්ලේ රැඳී සිටිමින් ලකුණු ලබා ගන්න සිදුවුණා. කොහොම වුණත් මම බලාපොරොත්තුවෙන් ඉන්නවා අවස්‌ථාවක්‌ ආවොත් උපරිමය කණ්‌ඩායමට ලබාදෙන්න.”

Leave a Reply

Your email address will not be published. Required fields are marked *

9 − 7 =