ඇමති විජේදාසට ජනපති තීරණය ලිඛිතව දන්වයි

(කොළඹ, ලංකාපුවත්) – අමාත්‍ය විජේදාස රාජපක්ෂ මහතා දරණ සියලු කැබිනට් අමාත්‍ය ධූරවලින් ඔහු ඉවත් කරන ලෙස එක්සත් ජාතික පක්ෂ නායකත්වය යොමුකළ ලිපිය සඳහා ජනාධිපති මෛත්‍රීපාල සිරිසේන මැතිතුමා අනුමැතිය ලබා දී තිබේ.

මේ පිළිබඳව ලිඛිතව විජේදාස රාජපක්ෂ අමාත්‍යවරයා වෙත දැනුම් දී ඇතැයි ජනාධිපති මාධ්‍ය අංශය සදහන් කළේය.

පසුගියදා පැවති එක්සත් ජාතික පක්ෂ කෘත්‍යාධිකාරී මණ්ඩල රැස්වීමේදී විජේදාස රාජපක්ෂ අමාත්‍යවරයා දිගින් දිගටම පක්ෂයේත් කැබිනට් මණ්ඩලයේත් සාමූහික වගකීම උල්ලංඝණය කර ඇති බවට චෝදනා එල්ල වුණි.

එමෙන්ම පසුගිය සති අන්තයේදී විජේදාස රාජපක්ෂ අමාත්‍යවරයා පක්ෂයේ අමාත්‍යවරුන් සහ රජයේ ප්‍රතිපත්ති විවේචනය කරමින් කැබිනට් අමාත්‍යවරයෙකු ලෙස සාමූහික වගකීම කඩ කරමින් කටයුතු කර ඇති බව එක්සත් ජාතික පක්ෂ මහ ලේකම් අමාත්‍ය කබීර් හෂීම් මහතා නිවේදනයක් නිකුත් කරමින් ඊයේ (22) සඳහන් කළේය.

ඒ අනුව විජේදාස රාජපක්ෂ අමාත්‍යවරයා දරණ සියලු කැබිනට් ධුරවලින් ඔහු ඉවත් කරන ලෙස එක්සත් ජාතික පක්ෂ නායකත්වය, ජනාධිපතිවරයාගෙන් ලිඛිතව ඉල්ලීමක් කර තිබුණි.

Leave a Reply

Your email address will not be published. Required fields are marked *