අමරදේව අසපුව මංගල ශිලා ප්‍රතිෂ්ඨාපනය අදයි

(කොළඹ, ලංකාපුවත්) – ජාතියේ මහා ගාන්ධර්ව ආචාර්ය පණ්ඩිත් අමරදේවයන් වෙනුවෙන් ඉදිවන අමරදේව අසපුවට මුල්ගල තැබීමේ මහෝත්සවය අද (28) පෙ.ව 10.00ට බත්තරමුල්ල,”අපේගම” පරිශ්‍රයේ දී පැවැත්වේ.

මුදල් හා ජනමාධ්‍ය අමාත්‍ය මංගල සමරවීර මහතාගේ සහ නියෝජ්‍ය අමාත්‍ය ලසන්ත අලගියවන්න මහතාගේ ආරාධනයෙන් අග්‍රමාත්‍ය රනිල් වික්‍රමසිංහ මහතාගේ සහභාගීත්වයෙන් ජනාධිපති මෛත්‍රිපාල සිරිසේන මැතිතුමාගේ ප්‍රධානත්වයෙන් මංගල ශිලා ප්‍රතිෂ්ඨාපනය සිදු කිරීමට නියමිතය.

සංගීත අසපුව පණ්ඩිත් අමරදේවයන් ජීවත්ව සිටි කාලයේ දී රජයෙන් කළ ඉල්ලීමක ප්‍රතිඵලයක් මෙන් ම එතුමාගේ අදාහන උත්සවයේ දී ජනාධිපති මෛත්‍රීපාල සිරිසේන මැතිතුමා විසින් දුන් පොරොන්දුවක් යථාර්ථයක් බවට පත්කරමින් මෙම අසපුව ඉදිකෙරෙනු ඇත. ඒ සඳහා අයවැය හරහා මුදල් හා ජනමාධ්‍ය අමාත්‍යංශය වෙත මුදල් ප්‍රතිපාදන වෙන් ව තිබේ.

බත්තරමුල්ල අපේගම ආසන්න නාගරික සංවර්ධන අධිකාරියට අයත් පර්චස් 120කට අධික භුමියක් පුරා මෙම සංගීත අසපුවේ ඉදිකිරීම් කටයුතු කෙරෙන අතර ම අමරදේව අසපුව ආයතනයක් ලෙසින් පාර්ලිමේන්තු පනතකින් ස්ථාපිත කිරීම සඳහා මේ වන විටත් කැබිනට් මණ්ඩලයේ අනුමැතිය හිමිව ඇතැයි ද පැවසීය.

මේ සඳහා රුපියල් මිලියන 250ක් වැයවෙතැයි ඇස්තමේන්තු කොට ඇති අතර ඒ සඳහා 2017 සහ 2018 වසරවලදී මහභාණ්ඩාගාරය වෙතින් මුදල් ප්‍රතිපාදන ලබාදීමට නියමිත අතර එහි ඉදිකිරීම් 2019 වසරේ මුල්කාර්තුව වන විට අවසන් කොට ජනතා අයිතියට පත්කිරීමට ද බලාපොරොත්තු වේ.

සමස්ත රටවාසීන්ගේ ම ගෞරවය හා ආදරය දිනාගත් අමරදේවයන් විසින් කළ සේවාව අනාගත පරපුර වෙත දායාද කිරීමේ අරමුණින් මෙම සංගීත අසපුව ඉදිකෙරේ.

සංගීත අසපුව තම පියාණන්ගේ අඳහසකට අනුව ඉදිවන බවත් එය පුස්තකාලය, ලේඛනාගාරයක් හා කෞතුකාගාරය සහ සංරක්ෂණගාරයකින් යුක්ත වන බවත් එම පරිශ්‍රය තුළ ම අමරදේව ස්මාරකයක් ඉදිවන අතර ම පණ්ඩිත් අමරදේවයන්ගේ වර්ෂ සැමරුම හා සමඟාමී ව එම පරිශ්‍ර යේ සුදුසු ස්ථානයක භෂ්මාවශේෂ තැන්පත් කිරීම කටයුතු කරන බවද රන්ජන් අමරදේව මහතා පැවසීය.

Leave a Reply

Your email address will not be published. Required fields are marked *

14 + 4 =