පහළ මල්වතුඔය ජලාශ ව්‍යාපෘතියේ මූලික අදියරේ ඉදිකිරීම් ඇරඹෙයි

(කොළඹ, ලංකාපුවත්) – පහළ මල්වතුඔය ජලාශය ඉදිකිරීමේ මූලික අදියර පසුගියදා ආරම්භ කෙරිණ. ඒ වාරිමාර්ග හා ජල සම්පත් කළමනාකරණ රාජ්‍ය අමාත්‍ය පාලිත රංගේ බණ්ඩාර මහතාගේ ප්‍රධානත්වයෙනි.

මූලික අදියර යටතේ තන්තිරිමලේ රජ මහා විහාරස්ථානය ආසන්නයේ ප්‍රධාන ව්‍යාපෘති කාර්යාලය ඉදිකිරීමට නියමිතය. එමෙන්ම මූලික අදියර යටතේ ක්‍රියාත්මක අනෙක් ව්‍යාපෘතිය වන්නේ මල්වතුඔය සිට යෝධවැව දක්වා දිවෙන පෝෂිත ඇල මාර්ගය ඉදි කිරීමයි. එහි දුර ප්‍රමාණය කිලෝමීටර් 27 කි.

මල්වතුඔය ජලාශයේ ඉදිකිරීම් ලබන වසරේ මුල් කාර්තුවේදී ආරම්භ කිරීමට නියමිත අතර ව්‍යාපෘතියේ සමස්ථ වියදම රුපියල් මිලියන 13000 කි. මෙරට ඉදිවන තුන්වන විශාලම ජලාශය වන්නේද මල්වතුඔය ජලාශයයි. තන්තිරිමලේ ප්‍රදේශයෙන් මල්වතුඔය හරස් කොට වැව් බැම්ම ඉදි කෙරෙන අතර එහි දිග ප්‍රමාණය කිලෝමීටර් 13 කි. යල මහ දෙකන්නයටම ජලය නොඅඩුව ලබා දෙමින් කුඹුරු අක්කර 40000 ක් පෝෂණය කිරීමත්, පානීය ජලය ලබා දීමත්, ජල විදුලි උත්පාදන ව්‍යාපෘතියක් ආරම්භ කිරීමත් මෙහි මූලික අරමුණු අතර වේ.

අනුරාධපුර, මන්නාරම, ත්‍රිකුණාමලය ඇතුලු ප්‍රදේශ ගණනාවක ජනතාවට මෙමගින් සෙත සැලසේ. එම් ප්‍රදේශවල නිරන්තරයෙන් ඇතිවන ගංවතුර උවදුරට මෙන්ම වන අලි උවදුරටද මල්වතුඔය ව්‍යාපෘතියෙන් විසදුම් යෝජනා වී තිබේ. ව්‍යාපෘතියට සමගාමීව තන්තිරිමලේ දියුණු නගරයක් ඉදි කෙටෙන අතර එම කලාපය සංචාරක කලාපයක් ලෙස වැඩි දියුණු කිරීමටද සැලසුම් කර තිබේ. ඒ අනුව ලමා උද්‍යාන, සෆාරි උද්‍යාන ඇතුලු සියලු නිමවුම් මෙම ව්‍යාපෘතියට ඇතුලතය. තන්තිරිමලේ විහාරස්ථානය ආශ්‍රිතව ඉදිකෙරෙන කටුගෙය තවත් විශේෂ ඉදිකිරීමකි.

මෙම ව්‍යාපෘතිය හේතුවෙන් ඉඩම් අහිමි වන ජනතාව වෙනත් ප්‍රදේශවල පදිංචි කිරීමද මූලික අදියරේ කටයුත්තක් ලෙස සැලසුම් කර තිබේ. එම ජනතාවගේ සියලු ගැටලුවලට ස්ථිර විසදුම් ලබා දීමෙන් අනතුරුව ජලාශයේ ඉදිකිරීම් ආරම්භ කරන ලෙසයි අමාත්‍ය පාලිත රංගේ බණ්ඩාර මහතා නිලධාරීන් වෙත උපදෙස් ලබා දී තිබෙන්නේ. එම ජනතාවට විසදුම් ලබා දීම සම්බන්දයෙන් ජනතාව සමගම සාකච්ඡා කර මේ වන විටත් තීරණවලට පැමිණීමට ද සමත් වී තිබේ.

Leave a Reply

Your email address will not be published. Required fields are marked *

eight − 7 =