මාධ්‍යට සිදුවූ පහරදීම් පිලිබඳ පරීක්ෂණවලටත් මූලිකත්වය දෙන්න – ඇමති සාගල

(කොළඹ, ලංකාපුවත්) –මාධ්‍ය ආයතන හා මාධ්‍යවේදීන්ට සිදුවූ බලපෑම් පිළිබඳ පරීක්ෂණ සඳහාත් මූලිකත්වය ලබා දී කටයුතු කරන්නැයි ඒ පිළිබඳ පරීක්ෂණ කරන ආයතනවලට නියෝග කර ඇති බව නීතිය හා සාමය සහ දක්ෂිණ සංවර්ධන අමාත්යර සාගල රත්නායක මහතා පැවසීය.

අමාත්‍යවරයා එසේ ප්‍රකශ කලේ මාධ්‍යවේදීන්ට හා මාධ්‍ය ආයතනවලට එරෙහි ප්‍රචණ්ඩත්වය පිටුදැකීමේ ජාත්‍යන්තර දින සැමරුම් උත්සවයට එක්වෙමිනි.

එසේම අමාත්‍යවරයා එහි දී කියා සිටියේ මාධ්‍යවේදීන්ට සිදු වූ බලපෑම් සම්බන්ධ ඇතැම් සිද්ධිවල සාක්ෂි පවා විනාශ කිරීමට අපරාධකරුවන් කටයුතු කර ඇති බවයි. එසේම ඇතැම් අපාරාධවලට සම්බන්ධ තොරතුරු ඇතුළත් වාර්තා පවා විනාශ කර ඇති බවයි.

තත්ත්වය එසේ වුවත් අදාළ සිද්ධි පිළිබඳ පරීක්ෂණ මේවන විට විශාල ප්‍රගතියක් අත්පත් කරගෙන ඇති බවත් අමාත්‍යවරයා පැවසීය. එසේම මේ පිලිබඳ සොයා බැලීමට නව නීති රීති හඳුන්වාදෙන බව යි. විශේෂයෙන්ම අමාත්‍යවරයා කියා සිටියේ ප්‍රගීත් එක්නැලිගොඩ වැනි සිද්ධිවලදී මළ සිරුර හමු නොවී ඝාතන චෝදනා ගොනු කිරිම සඳහා අවශ්‍ය නව නීති රීති හඳුන්වාදිය යුතු නම් ඒ සඳහා ද පසුබට නොවන බවයි. අදාළ පරීක්ෂණ පැවැත්වීමට කොතරම් දුෂ්කරතා ඇතිවුවවද ඒ සියලු සිද්ධි පිළිබඳ පරීක්ෂණ පැවත්වා වරදකරුවන්ට එරෙහිව නීතිය ක්‍රියාත්මක කිරීමට කටයුතු කරන බවද අමාත්‍යවරයා කීය.

කොළඹදී ඊයේ (04) පැවැත්වූ එම සැමරුම් උත්සවයේ දී උදයන් පුවත්පතේ කර්තෘ දේවනායගම් ප්‍රේමානන්ද මහතා ප්‍රකාශ කළේ තම පුවත්පත් ආයතනයට පසුගිය චෝගම් උත්සවයෙන් පසු කාලය තුළදී ඇතිවූ බලපෑම් පිළිබඳ පරීක්ෂණ සිදුවනවාද යන්න පිළිබඳවවත් නොදන්නා බවයි. එසේම අවස්ථා 37 කදී තම ආයතනයට බලපෑම් සිදුව තිබෙන බවත් උදයන් පුවත්පතේ කතුවරයා පැවසීය.

උදයන් කතුවරයාගේ ප්‍රක්ෂයට ප්‍රතිචාර දක්වමින් අමාත්‍ය සාගල රත්නායක මහතා අදාළ සිද්ධි පිළිබඳ තමාට තොරතුරු ලබා දෙන ලෙස පැවසූ අතර එම තොරතුරු ඇතුළත් ලිපි ගොණුවක් උදයන් කතුවරයා විසින් එහිදී අමාත්‍යවරයාට ලබා දෙන ලදී.

උදයන් පුවත්පතේ කර්තෘවරයා ලබා දුන් තොරතුරු ඇතුලත් ලිපිගොණුව නීතිය හා සාමය සහ දක්ෂිණ සංවර්ධන අමාත්‍යංශයේ ලේකම්වරයා මඟින් පොලිස්පතිවරයාට ලබා දීමට අමාත්‍ය සාගල රත්නායක මහතා කටයුතු කළේය.

එසේම මාධ්‍යවේදීන්ට සහ මාධ්‍ය ආයතනවලට සිදුවූ බලපෑම් සම්බන්ධ පැමිණිලි විමර්ශන කටයුතුවල ප්‍රගතිය පිළිබඳ පොලිස්පති පූජිත් ජයසුන්දර මහතාගෙන් ද අමාත්‍යවරයා විමසීමක් කළේය.

Leave a Reply

Your email address will not be published. Required fields are marked *

13 + 18 =