වයිබර් යළි වැඩ

(කොළඹ, ලංකාපුවත්) –මෙතෙක් තාවකාලිකව සීමා කර තිබූ වයිබර් සමාජ ජාලය (Viber) අද(13) මධ්‍යම රාත්‍රියේ සිට නැවත ලබා දීමට රජය තීරණය කර ඇති බව රජයේ ප්‍රවෘත්ති දෙපාර්තමේන්තුව නිවේදනය කරයි.

ව්‍යාපාරික ප්‍රජාවටත් ශ්‍රී ලංකාවට පැමිණෙන සංචාරකයින්ටත්, කුඩා පරිමාණ ව්‍යවසායකයින්ටත් මෙම වාරණය හේතුවෙන් පසුගිය දින කිහිපය තුළ සිදු වී ඇති අපහසුතාවන් පිළිබඳව ද රජයේ අවධානය යොමු වීමත් සමඟ මෙම කරුණු සලකා බලා මෙම තීරණය ගෙන ඇත.

රජයේ ප්‍රවෘත්ති දෙපාර්තමේන්තුව විසින් නිකුත් කළ සම්පූර්ණ නිවේදනය පහත පරිදි වේ.

“පසුගිය දිනවල රටේ ඇතැම් ප්‍රදේශවල කලහකාරී සිදුවීම් හටගත් අවස්ථාවේදී, මහජනතාව අතර වෛරී සහ වර්ගවාදී ප්‍රකාශ පතුරුවා හැරීමට සහ යම් ප්‍රචණ්ඩ ක්‍රියා සංවිධානය කිරීමට ඇතැම් පාර්ශවයන් විසින් නීති විරෝධී ලෙස සමාජ මාධ්‍ය ජාලා භාවිත කිරීම පාලනය කිරීම සඳහා, ඇතැම් සමාජ මාධ්‍ය මත තාවකාලික වාරණයක් පැනවීමට රජය විසින් කටයුතු කරන ලදී.

එම සමාජ මාධ්‍ය වාරණය පැනවීමෙන් අනතුරුව, කලහකාරී හැඟීම් සහ ප්‍රචණ්ඩත්වය වේගයෙන් පැතිර යාම සමනය වූ අතර, රටෙහි ආරක්ෂක තත්ත්වය නැවත යහපත් වෙමින් තිබෙන බව වාර්තා වී ඇත. එම මාධ්‍ය භාවිතා කරමින් සමාජ විරෝධී සහ නීති විරෝධී කටයුතුවලට සම්බන්ධ වූවන්ට එරෙහිව නීතිය ක්‍රියාත්මක කිරීම ආරම්භ කර තිබේ.

මෙහිදී, විශේෂයෙන්ම, විදෙස්ගත ශ්‍රමිකයින් හට සිය නිවෙස් සමග සන්නිවේදනය කිරීමේදී මුහුණ දීමට සිදු වන අපහසුතාවන් ගැන රජය සානුකම්පිතව සලකා බලා ඇත.

එමෙන් ම, ව්‍යාපාරික ප්‍රජාවටත් ශ්‍රී ලංකාවට පැමිණෙන සංචාරකයින්ටත්, කුඩා පරිමාණ ව්‍යවසායකයින්ටත් මෙම වාරණය හේතුවෙන් පසුගිය දින කිහිපය තුළ සිදු වී ඇති අපහසුතාවන් පිළිබඳව ද රජයේ අවධානය යොමු වී ඇත. මෙම කරුණු සලකා බලා, මූලික පියවරක් ලෙස, වයිබර් සමාජ ජාලය (Viber) වෙත මෙතෙක් තාවකාලිකව සීමා කර තිබූ ප්‍රවේශය අද දින මධ්‍යම රාත්‍රියේ සිට නැවත ලබා දීමට රජය තීරණය කර තිබේ.

මෙවන් තත්ත්වයක් නැවත ඇති නොවීම පිණිස අවශ්‍ය ප්‍රතිපාදන ක්‍රියාවට නැංවීම සඳහා දැනට තාවකාලික සීමාවකට ලක් කර ඇති අනෙකුත් සමාජ ජාලා ආයතන සහ වෙනත් පාර්ශවකාර ආයතන සමග රජය සාකච්ඡා පවත්වමින් සිටින අතර, නිසි ආරක්ෂණ සහ ආවේක්ෂණ විධිවිධාන පිළිබඳව සලකා බලමින්, එම සමාජ ජාලා සේවාවන් වෙත ප්‍රවේශය ද යථා කාලයේදී විවෘත කිරීමට හැකි වනු ඇතැයි විශ්වාස කෙරේ.

රජය සහ සමාජ ජාලා සේවාවන් මෙන්ම සමාජ ජාලා භාවිතා කරන ප්‍රජාව ද සමාජ හා ආරක්ෂක ස්ථායීභාවයක් සාක්ෂාත් කර ගැනීම සඳහා සෑම පුරවැසියකුගේම කැප වීම මෙහිදී රජය ඉල්ලා සිටී.

නීතිය සහ සාමය රැක ගැනීම සඳහා රජය ගත් මෙම ක්‍රියාමාර්ගයෙන් සිදු වූ යම් අපහසුවක් ඇතොත් ඒ පිළිබඳව රජය කණගාටුව පළ කරයි.“

Leave a Reply

Your email address will not be published. Required fields are marked *

3 − 1 =