කලාප මට්ටමින් ගුරු සංචිතයක් පිහිටුවීමට සැළසුමක්

(කොළඹ, ලංකාපුවත්) – සේවයේ නියුතු ගුරුවරුන් 10,000 කට ආසන්න සංඛ්‍යාවක් වාර්ෂිකව දරු ප්‍රසූතිය ඇතුළු වෙනත් හේතු මත නිවාඩු ලබාගන්නා බැවින් එම කාල වකවානුවල සිසුන්ගේ අධ්‍යාපන කටයුතුවලට බාධාවක් ඇති නොවන පරිදි පාසල්වල සේවය සඳහා යෙදවීමට කලාප මට්ටමින් ගුරු සංචිතයක් පිහිටුවීමට සැලසුම් කර ඇති බව අධ්‍යාපන අමාත්‍ය අකිල විරාජ් කාරියවසම් මහතා අධ්‍යාපන අමාත්‍යාංශයේ දී අද (23) පැවසීය.

ගුරු අධ්‍යාපනඥ සේවයේ 3 වන ශ්‍රේණියට බඳවාගැනීම සඳහා පැවති විවෘත තරග විභාගයෙන් සමත් වූ 24 දෙනෙකුට පත්වීම් ලිපි සහ සුදුසුකම් සම්පූර්ණ කරන ලද ශ්‍රී ලංකා විදුහල්පති සේවයේ 2 පන්තියේ නිලධාරීන් 263 දෙනෙකු ශ්‍රී ලංකා විදුහල්පති සේවයේ 1 පන්තියට උසස්වීම් ලිපි ප්‍රදානය වෙනුවෙන් අධ්‍යාපන අමාත්‍යවරයාගේ ප්‍රධානත්වයෙන් මෙම උත්සවය අමාත්‍යාංශ ශ්‍රවණාගාරයේ දී පැවැත්වුණි.

රැස්ව සිටි විදුහල්පතිවරුන්ට තම ගැටළු හෝ අදහස් ඉදිරිපත් කිරීමට ද අමාත්‍යවරයා අවස්ථාව ලබා දුන් අතර එහිදී පාසල් දරුවන් වෙනුවෙන් නොමිලේ නිල ඇදුම් ලබාගැනීම සදහා වවුචර් ක්‍රමය හදුන්වාදීම විදුහල්පතිවරුන්ගේ අගය කිරීමට ලක් විය.

ඉදිරියේ දී සිසුන්ට ලබාදෙන නිල ඇදුම් වවුචරයේ වටිනාකම වැඩි කිරීමට ඇති හැකියාව සොයා බලන ලෙස ද අමාත්‍යවරයා මෙහිදී නිලධාරීන්ට උපදෙස් ලබා දුන්නා.

මෙම උත්සව අවස්ථාවට අධ්‍යාපන ලේකම්වරයා සහ අධ්‍යාපන රාජ්‍ය ලේකම්වරයා ඇතුළු අමාත්‍යාංශ නිලධාරීන් රැසක් එක් ව සිටියහ.

Leave a Reply

Your email address will not be published. Required fields are marked *

13 + twelve =