(කොළඹ, ලංකාපුවත්) – එළඹෙන ජනවාරි මාසයේ සිට නව මුහුණුවරකින් යුතුව තවදුරටත් ශක්තිමත් ව්‍යාපාරයක් වශයෙන් ග්රාමශක්ති ජනතා ව්‍යාපාරය ආරම්භ කරන බව ජනාධිපති මෛත්‍රීපාල සිරිසේන මහතා ප්‍රකාශ කරයි.
ඒ අනුව ජනවාරි මාසයේ 23 – 30 සතිය ග්රාමශක්ති ජනතා ව්‍යාපාරයේ ග්රාමශක්ති සතියක් ලෙස ප්‍රකාශයට පත්කරන බව පවසන ඒ මහතා ඒ සතියේ දී මේ සම්බන්ධයෙන් වඩාත් උනන්දුවක්, ආකර්ෂණයක්, අවධානයක් ඇතිකර මේ සඳහා මීට වඩා ජනතාවගේ පෙළගැස්ම සහ ඔවුන් සහභාගි කරවා ගන්නා බවද ස්වශක්තිය තුළ ගොඩනැඟෙන්න රජයක් ලෙස කරන වැඩසටහන වඩාත් ශක්තිමත් කරන්න අපේක්ෂා කරන බවද සඳහන් කළේය.
ජනාධිපතිවරයා මේ බව සදහන් කළේ අනුරාධපුර පළාත් සභා ශ්‍රවණාගාරයේ දී ඊයේ (20) පැවැති දිළිඳුකම පිටුදැකීමේ ජාතික වැඩසටහන වන ‘ග්රාමශක්ති ජනතා ව්‍යාපාරයේ’ උතුරු මැද පළාත් මෙහෙයුම් කමිටු රැස්වීම අමතමිනි. සමෘද්ධිමත් මිනිසෙකු මෙන්ම, වගකීම් උසුලන, අයිතිවාසිකම් හඳුනන සමාජයීය මිනිසෙකු බිහි කිරීම අරමුණු කරගත් ග්රාමශක්ති ජාතික වැඩසටහන මඟින් එළඹෙන 2030 පමණ වනවිට ශ්‍රී ලංකාව දිලිඳුකමින් තොර රටක් බවට පත්කිරීම අරමුණු කරගෙන තිබෙන අතර ජනාධිපති මෛත්‍රීපාල සිරිසේන මහතාගේ සංකල්පයකට අනුව පසුගිය 2017 වසරේ දී මේ වැඩසටහන ආරම්භ කෙරිණි.
දුගී දුප්පත් ජනතාව එයින් මුදා ගනිමින් ඇති හැකි පිරිසක් බවට පත්කිරීම සඳහා ග්රාමශක්ති ජනතා ව්‍යාපාරය ආරම්භකර තිබෙන අතර 2017 වසරේ රට දුගිභාවයෙන් නිදහස් කර ගැනීමේ වැඩපිළිවෙළේ ප‍්‍රධාන ව්‍යාපෘතිය ලෙස මෙය ආරම්භ කෙරිණි. ඒ අනුව වර්ෂ 2020 වන විට ගම් 15,000ක ජීවත්වන ජනතාවගේ මූලික අවශ්‍යතා සැපිරීමට කටයුතු කෙරෙන අතර සමෘද්ධිමත් ආර්ථික මිනිසෙකු මෙන්ම, වගකීම් උසුලන, අයිතිවාසිකම් හඳුනන සමාජයීය මිනිසෙකු බිහි කිරීම ග්රාමශක්ති ජනතා ව්‍යාපාරයේ අරමුණ වී තිබේ.
එහිදී වැඩිදුරටත් අදහස් දක්වමින් ඒ මහතා පෙන්වා දුන්නේ 2018 වසර අවසන් වෙන්න තව ඉතිරිව තිබෙන්නේ සතියක් වැනි කෙටි කාලසීමාවක් වුවද වර්ෂ අවසානයේ රජයේ ආයතන ගිණුම්, අයවැය අවසන් කරන අවස්ථාවක් බවත් මේ සතිය තුළද ග්රාමශක්ති ජනතා ව්‍යාපාරයට හා අනෙකුත් ව්‍යාපෘති වෙනුවෙන් වෙන්කර තිබෙන මුදල්වලින් නිසි ප්‍රයෝජන ලබාගෙන එම වැඩසටහන් ක්‍රියාත්මක කිරීම සඳහා ප්‍රතිපාදන යොදා ගන්නා ලෙස ආයතන ප්‍රධානීන්ගෙන් ඉල්ලීමක් කරන බවත්ය.
මෙවැනි වැඩසටහන් වෙනුවෙන් ලද කිසිඳු මුදලක් ප්‍රයෝජනයට නොගෙන ආපසු මහා භාණ්ඩාගාරයට නොයවීමට කටයුතු කරන්නැයි සදහන් කළ ජනාධිපතිවරයා මේ සතිය තුළද ඒ වෙනුවෙන් කළහැකි ව්‍යාපෘති, ආයෝජන, සංවර්ධනයට දෙන දායකත්වය සහ ශක්තිය ඒ ජනතාවට ලබාදීම ඉතාම වැදගත් වන බවද සඳහන් කළේය.
ජනතාවට ස්වාධීනව නැගී සිටීමට අවශ්‍ය විභවය හඳුනාගෙන, ජනතාව විධිමත්ම සංවිධානය කොට ඉන් අනතුරුව, විශාල සමාගම් සමඟ සම සමව උරෙනුර ගැටී කටයුතු කළ හැකි ක‍්‍රමයක් මේ හරහා ඇති කෙරේ. දිළිඳු ජන සංඛ්‍යාව වැඩි වශයෙන් ජීවත්වන දිස්ත්‍රික්ක වෙත ප‍්‍රමුඛතාවය ලබාදෙමින් ග්රාමශක්ති ජනතා ව්‍යාපාරය දීප ව්‍යාප්තව ක්‍රියාවට නංවා තිබෙන අතර, ආරම්භයේ ගම් 1,000 ක් ආවරණ කරමින් 2020 වර්ෂය වන විට ගම් 5,000 ක් දක්වා ව්‍යාප්ත කිරීම සිදු වේ.
යෝගට් නිෂ්පාදන යන්ත්‍රයක් මිලට ගැනීම සඳහා රුපියල් ලක්ෂ 20ක මුදලක් පරිත්‍යාගය කිරීම, අතිරේක සමාගමක් ස්ථාපිත කිරීම සඳහා රුපියල් ලක්ෂ 10ක මුදලක් පිරිනැමීම ජනාධිපති මෛත්‍රීපාල සිරිසේන් මහතාගේ සුරතින් සිදුකෙරුණු අතර නිෂ්පාදන ගම්මානවල නිෂ්පාදන මිලදී ගැනීම සම්බන්ධයෙන් වන අවබෝධතා ගිවිසුමට අත්සන් කිරීම ජනාධිපති මෛත්‍රීපාල සිරිසේන් මහතා ඉදිරියේ සිදුවිය.
උතුරු මැද පළාත් ආණ්ඩුකාර රෙජිනෝල්ඩ් කුරේ, කෘෂිකර්ම ග්‍රාමීය ආර්ථික සංවර්ධන පශු සම්පත් සංවර්ධන සහ ධීවර ඇමැති පී.හැරිසන්, පාර්ලිමේන්තු මන්ත්‍රීවරුන් වන එස්.එම් චන්ද්‍රසේන, තිස්ස කරලියද්ද, වීරකුමාර දිසානායක මහත්වරු ඇතුළු විශාල පිරිසක් මේ අවස්ථාවට එක්ව සිටියහ.
