බෝම්බකරුවන් නවයෙන් 08ක් හඳුනාගෙන

(කොළඹ, ලංකාපුවත්) – පසුගිය ඉරිදා කොච්චිකඩේ, කටාන හා මඩකළපුව ප‍්‍රදේශවල සිදුවූ ප‍්‍රහාරවලට සම්බන්ධව මිය ගිය මරාගෙන මැරෙන බෝම්බකරුවන් නවදෙනෙකුගෙන් අටදෙනෙකුම මේ වන විට අපරාධ පරීක්ෂණ දෙපාර්තමේන්තුව විසින් හඳුනාගෙන ඇතැයි ජනමාධ්‍ය කැබිනට් නොවන ඇමති හා ආරක්ෂක රාජ්‍ය ඇමති රුවන් විජේවර්ධන මහතා පවසයි.

මෙම ප‍්‍රහාරය සිදුකළ සංවිධානයේ සාමාජිකයින් ශ‍්‍රී ලංකාවේ ධනවත් පවුල්වලට අයත් විදේශයන්හි උසස් අධ්‍යාපනය ලැබූ අය බව පරීක්ෂණවලදී හෙළිදරව් වී ඇතිබව ද රජයේ ප‍්‍රවෘත්ති දෙපාර්තමේන්තුවේ දී විදේශ මාධ්‍ය සඳහා අද (24) පැවැත්වූ මාධ්‍ය හමුවේ දී ඇමැතිවරයා ප්‍රකාශ කළේ ය.

මෙම පිරිසට විදේශ මූල්‍ය ආධාර හා විදේශ පුහුණුව ලැබී ඇති බවට තොරතුරු ලැබී තිබේ. මෙම ප‍්‍රහාරය පිළිබඳව සැකපිට පුද්ගලයින් 60 ක් මේ වන විට අත්අඩංගුවට ගෙන ඇති අතර ඉන් 32 කුගෙන් මේ වන විට අපරාධ පරීක්ෂණ දෙපාර්තමේන්තුව විසින් ප‍්‍රශ්න කරමින් සිටින බවද ඒ මහතා කීය.

ශ‍්‍රී ලංකා බුද්ධි අංශ එක්සත් ජනපදය, ඉන්දියාව, ඔස්ටෙ‍්‍රිලියාව බ්‍රිරිතාන්‍යය ආදී රටවල බුද්ධි අංශ සමඟ සමීපව කටයුතු කරන අතර ඇමරිකන් ඒෆ්. බී අයි. පරික්ෂණ නිළධාරීන්ද පසුගිය ඉරිදා මෙරට සිදුවු බෝමිබ ප‍්‍රහාරයේ පරික්ෂණ පැවැත් වීමට පැමිණ සිටින බවද අමාත්‍ය රුවන් විජේවර්ධන මහතා පැවසීය. ඉදිරි දින කිහිපය තුළ මෙම ප‍්‍රහාරවලට සම්බන්ධ සියලුදෙනාම අත්අඩංගුවට ගැනිමට හැකි වෙතැයි විශ්වාස කරන බවද අමාත්‍යවරයා සඳහන් කළේ ය.

Leave a Reply

Your email address will not be published. Required fields are marked *

six − one =