මිත්‍ර ශක්ති යුධ අභ්‍යාසය ලබන ඉරිදා ඉන්දියාවේදී

(කොළඹ, ලංකාපුවත්) –ඉන්දීය යුද්ධ හමුදාව සහ ශ්‍රී ලංකා යුද්ධ හමුදාව අතර යුද්ධ හමුදා සම්බන්ධතා තවදුරටත් ශක්තිමත් කිරීමේ අරමුණින් සති දෙකක කාළයක් පුරා පැවැත්වීමට සැලසුම් කර ඇති දිගුකාලීන හමුදා අභ්‍යාසය හෙවත් 7 වන මිත්‍ර ශක්ති යුධ පුහුණු අභ්‍යාසය ලබන ඉරිදා (01) ඉන්දියාවේ පිහිටි පූනේ කුමාඕන් කඳවුරු පරිශ්‍රයේදී ආරම්භ වේ.

මෙම යුධ අභ්‍යාසය සඳහා ශ්‍රී ලංකා යුද්ධ හමුදා ගැමුණු හේවා බලකායේ යුද්ධ හමුදා සමාජිකයින් 120 ක් පමණ සහභාගී වනු ඇත. එම අභ්‍යාසය සඳහා ඉන්දීය හමුදාවේ ජවාන්ස් කුමාඕන් රෙජිමේන්තුවේ (Jawans from Kumaon Regiment) සෙබළුන් ඒ හා සමාන ප්‍රවාහයක් සහභාගීවීමට නියමිතය.

හත්වන වරටත් සති දෙකක කාළයක් පුරා පැවැත්වීමට නියමිත මිත්‍ර ශක්ති යුද අභ්‍යාසය සඳහා සහභාගි වන භටපිරිස් තුළ දෙරට අතර පවතින අන්තර් සම්බන්දතා වැඩි දියුණු කර ගැනීම, යුධ සහයෝගීතාවය, ඒකාබද්ධ උපාය මෙහෙයුම් පැවැත්වීම, දෙරට යුද අත්දැකීම් හුවමාරු කර ගැනීම, අන්තර්ජාතික යුද ගැටළු පිළිබඳ අවබෝධය හා අනාගතයේදී සිදුවිය හැකි ආරක්‍ෂක තර්ජන සඳහා සුදානම් වීමට අවශ්‍ය ප්‍රමාණවත් දැනුමක් ලබාගැනීමට හැකිවනු ඇතැයි ශ්‍රී ලංකා යුද හමුදාව සදහන් කරයි.

ඉන්දියානු හමුදාව විසින් සංවිධානය කරන ලද ‘මිත්‍ර ශක්ති’ ඒකාබද්ධ යුද අභ්‍යාසය සඳහා ශ්‍රී ලංකා යුද්ධ හමුදාවේ සහභාගී වීමට නියමිත ගැමුණු හේවා රෙජිමේන්තුවේ නිලධාරීන් 11 දෙනෙකු සහ සෙසුනිලයින් 109 දෙනෙකුගෙන් යුත් කණ්ඩායම හෙට (29) සවස ඉන්දියාව බලා පිටත්ව යාමට නියමිතය.

මෙම අභ්‍යාසය 2012 වර්ෂයේ සිට දෙරට අතර වාර්ෂිකව පවත්වනු ලබන යුද පුහුණු අභ්‍යාසයක් වන අතර එය දෙරට අතර පවතින අන්තර් සම්බන්දතා වැඩි දියුණු කර ගැනීමේ අරමුණින් ඉන්දියාවේ තුන් වතාවක් සහ ශ්‍රී ලංකාවේ තුන් වතාවක් පවත්වා ඇත.

මෙම ඒකාබද්ධ යුධ අභ්‍යාස වැඩසටහනේ අරමුණ වනුයේ යුධ උපක්‍රම පිළිබඳව දෙරට අතර ඇති දැනුම හුවමාරු කර ගැනීමයි. එහිදි පාබල අවි ආයුධ ඵලදායී ලෙස යොදා ගැනීම, පාබල හමුදා තාක්‍ෂනය, ප්‍රති ත්‍රස්ථ සටන් ක්‍රම, කුඩා කණ්ඩායම් මෙහෙයුම්, සැඟවුණු වෙඩික්කරු පුහුණුව, දිගුදුර මෙහෙයුම්, ත්‍රස්තවාදී සැඟවුනු බෝම්බ ප්‍රහාර, මරාගෙන මැරෙන බෝම්බ ප්‍රහාර හා දෙරට අතර වැඩි දියුණු කරන ලද පුපුරණ ද්‍රව්‍ය පිළිබඳව පුහුණු අභ්‍යාසයන් පැවැත්වේ.

යුද්ධ හමුදාධිපති ලුතිනන් ජෙනරාල් ශවේන්ද්‍ර සිල්වා මහතාගේ මාර්ගෝපදේශණය යටතේ අධ්‍යක්‍ෂ ජෙනරාල් පාබල මේජර් ජෙනරාල් මනෝජ් මුදන්නායක සහ පාබල අධ්‍යක්‍ෂ බ්‍රිගේඩියර් දේශප්‍රිය ගුණවර්ධන මහත්වරුන්ගේ ප්‍රධානත්වයෙන් යුද අභ්‍යාසය සඳහා අවශ්‍ය සියළු කටයුතු අවසන් කර ඇත.

කර්නල් භාතිය මුදන්නායක මහතා මිත්‍ර ශක්ති යුද අභ්‍යාසයේ සම්බන්ධීකාරක සහ නිරීක්‍ෂක ලෙස කටයුතු කරන අතර මේජර් රුවන් එදිරිසිංහ මහතා ‘මිත්‍ර ශක්ති – VII’ යුද අභ්‍යාසයේ අධීක්‍ෂකයෙකු ලෙස කටයුතු කරයි.

Leave a Reply

Your email address will not be published. Required fields are marked *

four × 4 =