වියට්නාමයෙන් ශ්‍රී ලංකාවට ආයෝජන අවස්ථා ආකර්ෂණයට ඇති හැකියා බොහොමයි

(කොළඹ, ලංකාපුවත්) – වියට්නාමයෙන් ශ්‍රී ලංකාවට ආයෝජන අවස්ථා ආකර්ෂණය කර ගැනීමට බොහෝ හැකියාව ඇති බව ශ්‍රී ලංකාවේ වියට්නාම තානාපතිනි හෝ තී තාන් ටෘක් මහත්මිය ප්‍රකාශ කළාය.

ඉදිරි වර්ෂවල දී ශ්‍රී ලංකාව සහ වියට්නාමය අතර ද්විපාර්ශ්වික සබඳතා ඉහළ නැංවීමට බොහෝ අවස්ථා ඇති බව තානාපතිනිය විශ්වාසය පළ කළාය.

ශ්‍රී ලංකාවේ වියට්නාම තානාපතිනි හෝ තී තාන් ටෘක් මහත්මිය ( Ho Thi Thanh Truc) ඊයේ (20) පස්වරුවේ අරලියගහ මන්දිරයේ දී අගමැති මහින්ද රාජපක්ෂ මහතා හමුවූ අවස්ථාවේ එසේ කීවාය.

2019 වර්ෂයේ දී පමණක් දෙරට අතර වෙළෙඳාම අමෙරිකානු ඩොලර් මිලියන 300 ඉක්ම වූ බව තානාපතිනිය පෙන්වා දුන්නාය.

ආයෝජනවලට අමතරව, ශ්‍රී ලංකාව සහ වියට්නාමය අතර බෞද්ධ සබඳතා වැඩිදියුණු කිරීමට සිය රට උනන්දු වන බව ද තානාපතිනිය මෙහි දී හෙළි කළාය.

එම යෝජනාව සම්බන්ධයෙන් එකඟත්වය පළ කළ අගමැති මහින්ද රාජපක්ෂ මහතා, ඓතිහාසික බෞද්ධ උරුමය පදනම් කරගනිමින් දෙරටේම ජනතාවට වැදගත් වන අයුරින් අන්‍යෝන්‍ය සබඳතා තහවුරු කළ හැකි බව පෙන්වා දුන්නේය.

හරිත රූපවාහිනිය සමඟ දැනටමත් බෞද්ධ වැඩසටහන් හුවමාරු කර ගැනීම අරඹා ඇතැයි ටෘක් මහත්මිය මෙහි දී ප්‍රකාශ කළාය.

වියට්නාම බෞද්ධ විහාරස්ථානයක් ශ්‍රී ලංකාවේ ස්ථාපිත කිරීම සහ දෙරට අතර ආගමික නායකයන් හා සිසුන් අතර අධ්‍යයන හුවමාරු වැඩසටහන් පවත්වාගෙන යාම සම්බන්ධයෙන් මෙහි දී අවධානය යොමු විය.වියට්නාම බෞද්ධ භික්ෂූන් වහන්සේ සිය නමක් පමණ දැනට ශ්‍රී ලංකාවේ අධ්‍යාපනය ලබන බව ද මෙහි දී සඳහන් විය.

දෙරටේ පාර්ලිමේන්තු සබඳතා වැඩි දියුණු කරමින් පාර්ලිමේන්තු මන්ත්‍රීවරුන්ගේ අධ්‍යයන නිරීක්ෂණ චාරිකා සංවිධාන කිරීම සහ දෙරට අතර මේ වනවිටත් පවතින සහයෝගීතා වැඩසටහන් අඛණ්ඩව පවත්වා ගැනීම පිළිබඳවත් මෙහිදී අවධානය යොමු විය.

ශ්‍රී ලංකාවේ වියට්නාම තානාපතිනි ලෙස හෝ තී තාන් ටෘක් මහත්මිය පසුගිය මාර්තු මාසයේ සිට කටයුතු කරන්නීය.

Leave a Reply

Your email address will not be published. Required fields are marked *

five + 5 =