රටට මුල් තැන දී කටයුතු කරන ලෙස ශ්‍රීලංකන් ගුවන් සේවය ගුවන් නියමුවන්ගේ සංසදයේ සාමාජිකයින්ගෙන් ඉල්ලා සිටියි

(කොළඹ, ලංකාපුවත්) –ශ්‍රීලංකන් ගුවන් සේවය විසින් ලොව පුරා COVID-19 වසංගතය ව්‍යාප්ත වී යාම ආරම්භ වූ අවස්ථාවේ සිට ලෝකයේ සෙසු රටවල් සමඟ අත්‍යවශ්‍ය වෙළඳ සම්බන්ධතා පවත්වා ගනිමින් ජාතික ආර්ථිකයට සහයෝගය ලබාදීමේ වැදගත් කාර්යභාරයක් ඉටු කර තිබේ. එසේම 2020 මාර්තු මාසයේ දී බණ්ඩාරනායක ජාත්‍යන්තර ගුවන්තොටුපල වසා දැමූ අවස්ථාවේ සිට මේ දක්වාම විදෙස් රටවල අතරමං වූ ශ්‍රී ලාංකිකයින් දිවයිනට රැගෙන ඒමේ මානුෂීය ක්‍රියාන්විතයට ද සහයෝගය ලබාදෙමින් සිටියි.

ගෙවී ගිය මාස නවයක කාලය තුළ ගුවන් තොටුපළවල් වසා දැමීම සහ විවිධ රටවල් විසින් පනවා තිබූ සංචාරක සීමා කිරීම් හේතුවෙන් ගුවන් සමාගමේ සමස්ත ගුවන් යානා ඇණියම බොහෝවිට ගොඩබස්සවා තැබීමට සිදුවිය. එහි ප්‍රතිඵලයක් වශයෙන්, ගුවන් ගමන් වාර ගණන අඩුවීම, විදෙස් රට වල සිටි ශ්‍රී ලාංකික පුරවැසියන් නැවත මෙරටට ගෙන්වා ගැනීමට මෙහෙයුම් සිදු කිරීම සහ වෛද්‍ය සැපයුම් ඇතුළු අත්‍යවශ්‍ය ගුවන් භාණ්ඩ ප්‍රවාහනය කිරීමට සිදුවීම හේතුවෙන් පෙර නොවූ විරූ ආදායම් අහිමිවීමේ කාලපරිච්ඡේදකයට ගුවන් සමාගම මුහුණ දෙමින් සිටියි.

මෙම තත්ත්වය මත ගුවන් සේවයට තාවකාලික ගුවන් ගමන් කාලසටහනක් අනුගමනය කිරීමට සිදුවූ අතර, ශ්‍රී ලාංකිකයන් නැවත මෙරටට ගෙන්වා ගැනීම සහ අත්‍යාවශ්‍ය භාණ්ඩ ප්‍රවාහනය කිරීම සම්බන්ධයෙන් රටේ අවශ්‍යතාවන්ට කඩිනමින් ප්‍රතිචාර දැක්වීමට සිදුවිය. ඒ අනුව COVID-19 වැළැක්වීම සඳහා බලධාරීන් විසින් නියම කර ඇති මාර්ගෝපදේශයන්ට අනුකූලව කෙටි දැනුම්දීමකින් රාජකාරියට වාර්තා කිරීමට ගුවන් සමාගමේ සියලුම සේවකයින්ට සිදුවිය. එහිදී ගුවන් සේවය ගනු ලබන පූර්වාරක්ෂක ක්‍රියාමාර්ග සහ ගුවන් සමාගම විසින් සෑම විටම සපයනු ලබන පුද්ගලික ආරක්ෂක උපකරණ හේතුවෙන් රාජකාරියේ යෙදී සිටියදී සේවකයින්ගේ ආරක්ෂාව සැමවිටම සහතික කරන ලදී.

මෙම දුෂ්කර කාලපරිච්ඡේදය ජය ගැනීම සඳහා අතිගරු ජනාධිපති ගෝඨාභය රාජපක්ෂ මහතාගේ නායකත්වයෙන් යුත් ශ්‍රී ලංකා රජය, ජාතික ගුවන් සේවය මත සම්පූර්ණ විශ්වාසය තබා තිබේ. රජය විසින් මුහුණ දෙන මූල්‍යමය අභියෝග මධ්‍යයේ වුවද ගුවන් සේවය වෙනුවෙන් අයවැයෙන් අවශ්‍ය මුදල් නොවරදවාම ලබා දී තිබේ. එබැවින් රට නැවත ගොඩනැඟීම සඳහා රජය ගන්නා උත්සාහයට සහාය වීම සේවකයින්ගේ අතිශය යුතුකමකි. මෙම වසංගතය ආරම්භයේ සිටම ශ්‍රීලංකන් ගුවන් සේවයේ සේවකයින් දැඩි හා අනපේක්ෂිත සේවා පරිසරයක වැඩ කිරීමට සිදුවීම නිසා බොහෝ දුෂ්කරතා විඳදරාගෙන ඇති අතර වැටුප් කප්පාදු හේතුවෙන් ඔවුන්ගේ ආදායමෙන් යම් ප්‍රතිශතයක් ද අඩුවිය.

කෙසේ වෙතත් මීට එරෙහිව ශ්‍රීලංකන් ගුවන් නියමුවන්ගේ සංසදයේ (ALPG) විධායක කමිටුවේ සාමාජිකයින් අකුරට වැඩ කිරීමට තීරණය කර ඇති අතර එය ගුවන් සමාගමේ මෙහෙයුම් වලට දැඩි බාධා ඇති කරනවා පමණක් නොව ගුවන් සේවය මෙන්ම රටේ සංවර්ධනය ද අනතුරට ලක් කිරීමකි. එසේම ALPG විසින් ගුවන් සමාගමෙන් ලැබෙන ඇමතුම්වලට ප්‍රතිචාර නොදක්වා සිටින ලෙස සහ හදිසි අවස්ථාවක් සඳහා රාජකාරියට වාර්තා කිරීමට එකඟ නොවන ලෙස සිය සාමාජිකයින්ට බල කිරීමට කටයුතු යොදා තිබේ.

ශ්‍රීලංකන් ගුවන් සමාගමේ සේවකයින්ගෙන් එක් කොටසක් හිතාමතාම සමාගමේ සෙසු කැපවී වැඩ කරන වටිනා සේවකයින්ගේ උත්සාහයන් සහ ශ්‍රී ලංකා රජයේ අධිෂ්ඨානය අඩපණ කිරීම පිළිබඳව අධ්‍යක්ෂ මණ්ඩලය සහ ගුවන් සේවය දැඩි ලෙස කලකිරීමට පත්ව සිටිති. එසේම ALPG හි මෙම ආත්මාර්ථකාමී ක්‍රියාවන් අධ්‍යක්ෂමණ්ඩලය, කළමනාකාරීත්වය සහ ගුවන් සේවයේ කැපවී වැඩ කරන අනෙකුත් සියලු සේවකයින් දැඩි ලෙස හෙළා දකින බව සඳහන් කළ යුතුව ඇත.

ALPG විසින් දක්වන මෙම විරෝධතාවයට ප්‍රධාන හේතුව වී ඇත්තේ COVID-19 ආසාධනය වන සාමාජිකයන් සඳහා විශේෂිත ප්‍රතිකාර පහසුකමක් සහිත ස්ථානයක් ගුවන් සමාගම විසින් ලබා නොදීමයි. කෙසේ වෙතත් එවැනි පහසුකමක් ගුවන් සමාගමේ සාමාජිකයන්ට ලබා දීම සඳහා අදාළ බලධාරීන්ගෙන් දැනටමත් ඉල්ලීම් සිදු කර ඇති අතර ඉක්මනින් එම පහසුකම ලබා දෙනු ඇතැයි ගුවන් සේවය අපේක්ෂා කෙරේ.

Leave a Reply

Your email address will not be published. Required fields are marked *

1 × one =