පාරිභෝගිකයාට එළවළු මිලට ගැනීමේදි කිසිදු අවහිරයක් වෙන්න දෙන්න එපා

(කොළඹ, ලංකාපුවත්) –පවතින කොවිඩ් වසංගත තත්ත්වය හමුවේ දඹුල්ල ආර්ථික මධ්‍යස්ථානය දින 14කට වසා දැමුව ද කොළඹ ඇතුළු අනෙකුත් ආර්ථික මධ්‍යස්ථානවලට එය බලපෑමක් නොවන පරිදි ක්‍රමවත් වැඩපිළිවෙලක් සකස් කරන ලෙස කෘෂිකර්ම අමාත්‍ය මහින්දානන්ද අලුත්ගමගේ මහතා උපදෙස් දෙනු ලැබීය.

දිවයිනේ සියලු ආර්ථික මධ්‍යස්ථානවල කලමනාකරුවන් අමාත්‍යාංශයට කැඳවා පැවති සාකච්ඡාවකදී මෙම උපදෙස් ලබා දී ඇත.

රාජ්‍ය අමාත්‍ය ශෂීන්ද්‍ර රාජපක්ෂ, එම අමාත්‍යාංශයේ රාජ්‍ය ලේකම් අනිල් විජේසිරි ඇතුළු අමාත්‍යාංශ නිලධාරීන්, සිවිල් ආරක්ෂක දෙපාර්තමේන්තුවේ අධ්‍යක්ෂ සහ ආර්ථික මධ්‍යස්ථානවල වෙළඳ සංගම් නියෝජිතයින් මෙම සාකච්ඡාවට සහභාගී වුහ.

ආර්ථික මධ්‍යස්ථානවල සෞඛ්‍ය නීතිරීති දැඩිව ක්‍රියාත්මක කරන ලෙසත්, ඒ සඳහා සිවිල් ආරක්ෂක දෙපාර්තමේන්තුව ඇතුළු ආරක්ෂක අංශවල සහය ලබා ගන්නා ලෙසත් මෙහිදී අමාත්‍යවරුන් අවධාරණය කළේය. දඹුල්ල වසා දැමීමෙන් ගොවි නිෂ්පාදන අලෙවියට අපහසුතා මතු නොවන පරිදි වෙනත් ආර්ථික මධ්‍යස්ථාන හා විකල්ප ක්‍රම යොදන ලෙසද අදාළ නිලධාරීන් මෙහිදී දැනුවත් කළේය.ආර්ථික මධ්‍යස්ථානවලට උෂ්ණත්වය පරීක්ෂා කිරීමේ උෂ්ණත්වමාන ඇතුළු අවශ්‍ය උපකරණ වහාම ලබාදෙන ලෙසද උපදෙස් දී ඇත.

දඹුල්ල වසා දැමීම හෝ කොවිඩ් තත්ත්වය හමුවේ ගොවි නිෂ්පාදන මිලදී ගැනීමේ ක්‍රියාවලියට කිසිදු අවහිරයක් සිදු නොවිය යුතු බවත්, එමෙන්ම එළවළු හා පලතුරු මිල ඉහළ දැමීම කිසිසේත් සිදු නොවිය යුතු බවත් මෙහිදී අමාත්‍යවරයා අවධාරණය කළේය.

Leave a Reply

Your email address will not be published. Required fields are marked *

17 − 9 =