(කොළඹ, ලංකාපුවත්) – ගිනිගැනීමට ලක් වූ එක්ස්ප්‍රස් පර්ල් නෞකාවේ කපිතාන්වරයාගෙන් මෙන්ම ප්‍රධාන හා උප ප්‍රධාන ඉංජිනේරුවරුන්ගෙන් අපරාධ පරීක්ෂණ දෙපාර්තමේන්තුව ඊයේ(31) ප්‍රකාශ සටහන් කර ගෙන තිබුණි. ඒ අනුව ඉදිරි විමර්ශන කටයුතු ක්‍රියාත්මක කරන බව පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ මහතා සඳහන් කළේය.
නෞකාවේ කාර්ය මණ්ඩලය නිරෝධායනයට ලක්කර සිටින වැල්ලවත්ත ප්‍රදේශයේ හෝටලය වෙත අපරාධ පරීක්ෂණ දෙපාර්තමේන්තුවේ නිලධාරීන් ඊයේ පෙරවරුවේ පැමිණ තිබුනි. එහිදී නෞකාවේ කපිතාන්වරයාගෙන් පැය 14 කට ආසන්න කාලයක් ප්‍රකාශ සටහන් කරගත් අතර ප්‍රධාන ඉංජිනේරුවරයාගෙන් පැය 13 ක් හා උප ප්‍රධාන ඉංජිනේරුවරයාගෙන් පැය 12 කට ආසන්න කාලයක් ප්‍රකාශ සටහන් කරගෙන තිබේ.
අපරාධ පරීක්ෂණ දෙපාර්තමේන්තුවේ නිලධාරීන් 10 දෙනෙකුගෙන් යුත් කණ්ඩායමක් විමර්ශන ක්‍රියාත්මක කරයි. ඊට අදාළව විශේෂඥ මත හා සාක්‍ෂි ද ලබා ගැනීමට නියමිත අතර නීතිපතිවරයාගෙන් අද දිනයේදී වැඩිදුර උපදෙස් ලබා ගැනීමට කටයුතු කරන බව ද පොලිස් මාධ්‍ය ප්‍රකාශකවරයා පැවසීය.
මීගමුව මාඔයේ සිට පානදුර දක්වා මුහුදු ප්‍රදේශයේ ධීවර කටයුතුවල නිරතවීම වළක්වමින් පනවා ඇති තහනම නැවත දැනුම් දෙනතුරු ක්‍රියාත්මකය. එසේ වුව ද අනෙකුත් මුහුදු ප්‍රදේශවල ධීවර කර්මාන්තයේ නිරතවීමට කිසිඳු ආකාරයක බාධාවක් නොමැති බව ධීවර දෙපාර්තමේන්තුව පැවසීය.
