(කොළඹ | ලංකාපුවත්) – රටේ ප්‍රජාතන්ත්‍රවාදය රැකීම සඳහා උපරිම කැපකිරීම කරන බව ජනාධිපති අනුර කුමාර දිසානායක මහතා පවසයි.
ජනපති ධුරයේ අද(23) දිවුරුම් දීමෙන් අනතුරුව ජාතිය අමතමින් ජනාධිපති කාර්යාලයේදී ජනාධිපතිවරයා මේ බව පැවසීය.
රට මුහුණ දී ඇති අභියෝගාත්මක අවස්ථාවේ දී එම අභියෝගයේ පියමන් කිරීමට මේ රටේ ජනාධිපතිවරයා ලෙස තමන් වෙත පැවරී ඇති වැඩ කොටස නිසි පරිදි ඉටුකරන බව මේ සමාජයට ඒත්තු ගැන්වීමට සූදානම් බව ශ්‍රී ලංකාවේ 9 වැනි විධායක ජනාධිපති අනුර කුමාර දිසානායක මහතා එම ධූරයේ වැඩ බාරගැනීමෙන් අනතුරුව ප්‍රථම වරට ජාතිය අමතමින් සපථ වුණා.
දේශපාලන සංස්කෘතියේ වෙනසක් සම්බන්ධව අදහස් දැක්වූ ජනාධිපතිවරයා ලෝකය සමග ගනුදෙනු කිරීමේ දී ලෝකයේ කුමන බල තුලනයන් තිබුණ ද රටට වඩාත් වාසිදායක ලෙස ඒ ඒ රාජ්‍යයන් සමග කටයුතු කිරීම තම පාලනයේ අපේක්ෂාව බව ද, ලෝකයේ හුදකලා නොවුන රාජ්‍යයක් ලෙස ලෝකයත් සමග ඒකාබද්ධව ගමන් කිරීම සඳහා අවශ්‍ය තීන්දු තීරණ ගැනීමට තමන් කිසිසේත් නොපැකිලෙන බව තහවුරු වුණා.
ජනාධිපති ලේකම් කාර්යලයේ දී අද පැවති චාම් මෙන්ම ගාම්භීර උත්සවයක දී ශ්‍රී ලංකාවේ 09 වැනි විධායක ජනාධිපතිවරයා ලෙස දිවුරුම් දුන් අනුර කුමාර දිසානායක මහතා සිය ධූරයේ හිඳිමින් ජාතිය අමතා කළ ඉතිහාසගත මංගල කථාව පහත දැක්වේ.
වැඩමවා වදාල ගෞරවණීය මහා නායක හාමුදුරුවන් වහන්සේලාගෙන්, අපේ පියතුමන්ගෙන්, කුරුක්කල් තුමන්ලගෙන්, මවුලවි තුමන්ලගෙන් ඒ වගේම තානාපතිවරුන් මහ කොමසාරිස්වරුන්, අග විනිසුරු තුමාගෙන්, ආරාධිත සියලු අමුත්තන්ගෙන් අවසරයි.
අපේ රටේ ප්‍රජාතන්ත්‍රවාදයේ වැදගත්ම ලක්ෂණය තමයි ජනතාව විසින් තමන් පාලනය කිරීම සඳහා පාලකයෙක් තෝරා පත් කරගැනීම. නමුත් මැතිවරණයට ඡන්දය ප්‍රකාශයට පත් කිරීම සහ පාලකයෙක් තෝරා පත් කරගැනීමෙන් පමණක් ප්‍රජාතන්ත්‍රවාදය අවසන් වන්නේ නෑ. ඒ ප්‍රජාතන්ත්‍රවාදයේ මූලික ලක්ෂණයක් වුවත් අපේ රටේ ප්‍රජාතන්ත්‍රවාදය ශක්තිමත් කිරීම වෙනුවෙන් ව්‍යුහයන්ගේ ශක්තිමත් භාවය මෙන්ම නීතිවල යම් ශක්තිමත් භාවයක් ඇතිවිය යුතු බව අප පිළිගන්නවා. ඒ නිසා මා ප්‍රථමකොටම අපේ රටේ ජනතාවට දැනුම්වත් කරන්න කැමතියි මේ රටේ ප්‍රජාතන්ත්‍රවාදය වෙනුවෙන් මාගේ උපරිම කැපවීම මාගේ ධූර කාලය ඇතුළත පෙන්නුම් කරන්න මා සූදානම්.
ඒ වගේම අපේ රටේ මැතිවරණයක දී බල හුවමාරුවක දී එය ප්‍රජාතාන්ත්‍රිකව සිදුවුන ඉතිහාසයක් තියනවා. කිසිදු විටෙක මැතිවරණයක දී සිදුවන බල හුවමාරුවක් කිසිම නායකයෙක් ප්‍රතික්ෂේප කර නෑ.
ඒ අනුව යමින් හිටපු ජනාධිපති ගරු රනිල් වික්‍රමසිංහ මැතිතුමා ජනතාවගේ ජන වරම සුහදව පිළිගනිමින් මේ ප්‍රජාතන්ත්‍රවාදී බල හුවමාරුව වෙනුවෙන් එතුමාගේ කැපවීමට එතුමාගේ ආදර්ශයට බෙහෙවින්ම ස්තුතිවන්ත වෙනවා
ඒ වගේම අපි ඉතා ගැඹුරින් තේරුම් අරන් තියනවා අපට ලැබෙන්නේ ඉතාමත් අභියෝගාත්මක රටක්. අපේ දේශපාලනය මීට වඩා පිරිසිදු විය යුතු, ජනතාව විශාල ලෙස අපේක්ෂා කරන පිරිසිදු දේශපාලන සංස්කෘතිකයක අවශ්‍යතාවය තියනවා. අප ඒ වෙනුවෙන් කැප වෙන්න සූදානම්.
අපේ රටේ දේශපාලකයා සහ දේශපාලනය පිළිබඳව පොදු පුරවැසියා තුළ තිබෙන්නේ අයහපත් අදහසක්. එය සුදුසු නැති තැනක් වගේ අදහසක් තිබෙන්නේ. ඒ නිසා අපේ පැත්තෙන් අපි උපරිම ලෙස නැවත දේශපාලකයා කෙරෙහිත්, දේශපාලනය කෙරෙහිත් උපරිම ලෙස මහජනයාගේ ගෞරවයත් මහජනයාගේ විශ්වාසයත් ගෙනඒම සඳහා අපගේ පාර්ශවයෙන් කළ හැකි සියල්ල කරන්න සූදානම්.
ඒ වගේම අපට ලැබෙන මෙම ගැඹුරුතම අර්බුදය හුදු ආණ්ඩුවකට, හුදු දේශපාලන පක්ෂයකට හුදු පුද්ගලයෙකුට පමණක් පියමන් කළ හැකි දෙයක් කියලා අප විශ්වාස කරන්නේ නෑ. මොකද මා මීට පෙරත් ප්‍රකාශ කරලා තියනවා. මා ඉන්ද්‍රජාලිකයෙක් නොවේ. මා මැජික් කරුවෙක් නොවේ. මා මේ රටේ ඉපදුන සාමාන්‍ය පුරවැසියෙක්.
හැකියාවන් තිබෙනවා. නොහැකියාවන් තිබෙනවා. දන්න දේවල් තිබෙනවා. නොදන්න දේවල් තිබෙනවා. හැබැයි මගේ ප්‍රමුඛතම කාර්යය හැකියාවන් උරාගෙන දන්න දේ එක් රැස් කරගෙන වඩාත් හොඳ තීන්දු තීරණ අරගෙන මේ රට මෙහෙයවීමයි.
ඒ නිසා ඒ සාමුහික මැදිහත්වීමේ කොටස්කරුවෙක් බවට පත්වීම තමයි මගේ වගකීම. ඒ වෙනුවෙන් සාමුහිකව මැදිහත්වීමේ කොටස්කරුවෙක් බවට මා පත්වෙනවා.
ඒ වගේම මේ අර්බුදය නිමා කිරීමේ දී පොදු පුරවැසියන්ට සියලු ක්ෂේත්‍රවල අයට විශාල වගකීමක් තියනවා. මා හැම දෙනාගෙන්ම සහාය අපේක්ෂා කරනවා ඒ වගකීම ඉටු කිරීම වෙනුවෙන්.
නමුත් අප තේරම් අරන් තියනවා රටේ ජනාධිපතිවරයා ලෙස මේ කාර්යය මෙහෙයවීමේ දී ප්‍රමුඛතම සහ ප්‍රධානම වගකීමක් මා සතුව තිබෙන බව. ඒ නිසා ක්‍රියාවෙන් භාවිතාවෙන් හැම අවස්ථාවකම මේ රටේ පුරවැසියන්ට මා ඒත්තු ගන්වන්න සූදානම් මේ අභියෝගයේ පියමන් කිරීම සඳහා මට පැවරී තිබෙන වැඩ කොටස මා නිසි පරිදි ඉටු කරන බව මේ සමාජයට ඒත්තු ගන්වන්න මා සූදානම්.
ඒ වගේම විශේෂයෙන්ම අප දන්නවා අපේ රටට ජාත්‍යාන්තරමය සහාය අවශ්‍යයයි . ඒ නිසා ලෝකයේ කවර බලබෙදීම් තිබුණත් අපට වඩාත් වාසි සහගත ලෙස ඒ ඒ රාජ්‍යයන් සමග කටයුතු කිරීම අපේ අපේක්ෂාවක්. අප ලෝකයෙන් හුදකලා විය යුතු රාජ්‍යයක් නොවේ. ලෝකයත් එක්ක ඒකාබද්ධව සාමුහිකව ඉදිරියට යා යුතු රාජ්‍යයක්. ඒ පිළිබඳව අවශ්‍ය තීන්දු තීරණ ගන්න අප කිසිසේත්ම පැකිලෙන්නේ නෑ.
ඒ වගේම අපේ රට ගොඩනැගීමේ දී කර්මාන්තකරුවන්ට ව්‍යවාසයකයන්ට විශාල කාර්යභාර්යයක් තියනවා. ඒ නිසා ඔවුන් වඩාත් ශක්තිමත්ව අපේ රට ගොඩනැගීම සඳහා රජයේ ක්‍රියාවලිය සහාය දෙයි, උදව් කරයි කියන විශාල බලාපොරොත්තුවක් අපට තියනවා.
අවසාන වශයෙන් මා කියන්නේ අපේ රටේ ප්‍රජාතන්ත්‍රවාදය විසින් අපේ රටේ ජනාධිපතිවරයා හැටියට මා තෝරා පත්කරගෙන තිබෙනවා. ඒ තෝරා පත්කරගැනීම සඳහා ජනතාව මට ඡන්දය ලබා දී තිබෙනවා. මට ලබා නොදුන් ඡන්ද ප්‍රමාණයකුත් තිබෙනවා.
ඒ නිසා අපේ ජයග්‍රහණයේ සංයුතිය සහ ප්‍රමාණය පිළිබඳව අපට ඉතා හොඳ අවබෝධයක් තිබෙනවා. ඒ නිසා මාගේ පාලන කාලය තුළ මට පැවරී තිබෙන කාර්යය තමයි අපට සහාය නුදුන් අපව විශ්වාස නොකරන පුද්ගලයින්ට සහාය දැක්විය හැකි සහ විශ්වාසය ගොඩනගා ගත හැකි වැඩ පිළිවෙළක් දියත් කිරීම.
එය කළ හැකියි කියන දේ පිළිබඳව දැඩි විශ්වාසයක් තිබෙනවා. ඉදිරියේ දී මේ සියල්ල ප්‍රායෝගිකවත්, ඉදිරියේදී මේ සියල්ල අත්දැකීමෙන් අත් විඳීමටත් පුලුවන් වේවි. ඒ සඳහා සියලු ජනතාවගෙන් සහාය අපේක්ෂා කරනවා.
