(කොළඹ, ලංකාපුවත්) – ජාතික ළමා ආරක්ෂක අධිකාරිය විසින් අපයෝජන හා විවිධ අපරාධ සඳහා ගොදුරුවන දරුවන්ගේ සාක්ෂි වීඩියෝ සාක්ෂි ලෙස පටිගත කර අධිකරණයට ඉදිරිපත් කිරීම සඳහා ආරම්භ කර ඇති වැඩපිලිවලෙහි පළාත් මට්ටමෙන් ස්ථාපිත පළමු මධ්‍යස්ථානය උතුරු කොළඹ ශික්ෂණ රෝහල තුළ පිහිටි ළමා පියස පරිශ්‍රයේ දී ආරම්භ කෙරේ.
කාන්තා හා ළමා සංවර්ධන, පෙර පාසල් හා ප්‍රාථමික අධ්‍යාපන, පාසල් යටිතල පහසුකම් හා අධ්‍යාපන සේවා රාජ්‍ය අමාත්‍ය පියල් නිශාන්ත ද සිල්වා මහතාගේ ප්‍රධානත්වයෙන් ඊයේ(23) එය සිදුවිය.
ජාතික ළමා ආරක්ෂක අධිකාරියේ පනතේ නීතිමය ප්‍රතිපාදනයන්ට යටත්ව ආරම්භ කරන ලද නව මධ්‍යස්ථානය මඟින් අපයෝජනයට හා විවිධ අපරාධ සඳහා ගොදුරුවන දරුවන්ගේ සාක්ෂි වීඩියෝ පටිගත කිරීම මඟින් ලබාගනිමින් අධිකරණයේ පැවැත්වෙන නඩු විභාග සඳහා ඉදිරිපත් කෙරේ. එමඟින් යුක්තිය පසඳලීමේ ක්‍රියාවලිය තුල දරුවන් විවිධ ආකාරයෙන් ද්විතික වින්දිත බාවයට පත්වීම සහ සමාජයට අනාවරණය වීම තුලින් සමාජමය වශයෙන් පත්වන අපහසුතාවයන් වැලැක්වීමට හැකි වේ. එසේම පොලිස්ථානයක් තුලදී හෝ වෙනත් ස්ථානයකදී දරුවන් සාක්ෂි ලබාදිමේ කටයුතුවලට සම්බන්ධවීම මඟින් ඇතිවිය හැකි අහිතකර බලපෑම් වලක්වා ගනිමින් ළමා මිතුරු පරිසරයක් තුළ දරුවාගේ උපරිම යහපත සහ ආරක්ෂාව සැලැස්වෙන ආකාරයෙන් ක්‍රියා කිරීමට මෙම වැඩපිළිවෙල ඉවහල් වේ.
එසේම අපයෝජනයට ලක්වන දරුවන්ගේ වීඩියෝ සාක්ෂි පටිගත කිරීම පුහුණු උපදේශන නිලධාරීන් සහ වෘතීය මට්ටමේ තාක්ෂණික දැනුම ඇති වෘතිකයන් හරහා සිදුකිරීම මගින් මෙම සාක්ෂි වඩාත් විශ්වසනීයව හා බලපෑමකින් තොරව ලබාගත් අපක්ෂපාති සාක්ෂි ලෙස අධිකරණයට ඉදිරිපත් කිරීමට හැකියාව ඇත.
වසර 21කට පසුව පළාත් මට්ටමෙන් රෝහල් පරීශ්‍රයක ආරම්භ කරන ලද මෙම සාක්ෂි පටිගත කිරීමේ සමාරම්භක උළෙලට සහභාගී වෙමින් රාජ්‍ය අමාත්‍ය පියල් නිශාන්ත ද සිල්වා මහතා මේ බව කියා සිටියේය.
