(කොළඹ | ලංකාපුවත්) – කෘෂිකර්මාන්තය දියුණු නොකොට ග්‍රාමීය ආර්ථිකය ශක්තිමත් කළ නොහැකි බව ජනාධිපති රනිල් වික්‍රමසිංහ මහතා පැවසීය.
එබැවින් රජයේ කෘෂි නවීකරණ වැඩසටහන ඇතුළු ග්‍රාමීය ආර්ථිකය දියුණු කිරීමට රජය ආරම්භ කළ සියලු වැඩසටහන් සාර්ථක කර ගැනීමට බිම් මට්ටමේ රාජ්‍ය නිලධාරීන්ගේ කැපවීම අත්‍යාවශ්‍ය බවද ජනාධිපතිවරයා අවධාරණය කළේය.
ජනාධිපති රනිල් වික්‍රමසිංහ මහතා මේ බව සඳහන් කර සිටියේ නව ග්‍රාම නිලධාරීන් ලෙස බඳවාගත් 2100කට පත්වීම් ලිපි ප්‍රදානය වෙනුවෙන් අද (08) පෙරවරුවේ අරලියගහ මන්දිරයේ පැවති උත්සවය අමතමිනි.
විභාග දෙපාර්තමේන්තුව විසින් 2023 වසරේ දෙසැම්බර් මස 02 වැනිදා පවත්වන ලද ග්‍රාම නිලධාරී විභාගයේ ප්‍රතිඵල අනුව ප්‍රාදේශීය ලේකම් කොට්ඨාස මට්ටමින් වැඩිම ලකුණු ලබා ගත් අයැදුම්කරුවන් අතරින් 2100 දෙනකු වෙනුවෙන් මෙසේ ග්‍රාම නිලධාරී පත්වීම් ප්‍රදානය සිදු කෙරිණි.
ජනාධිපති රනිල් වික්‍රමසිංහ මහතා සංකේතාත්මකව පත්වීම් ලිපි ප්‍රදානය කිරීමට එක් විය.
අඩු ආදායම් ලාභී ජනතාව නගා සිටුවීමට රජය ආරම්භ කර ඇති අස්වැසුම, උරුමය ඇතුළු වැඩසටහන් පිළිබඳ මෙහිදී නව ග්‍රාම නිලධාරීන් දැනුවත් කළ ජනාධිපතිවරයා මෙම සියලු වැඩසටහන්වල අරමුණ ග්‍රාමීය ආර්ථිකය දියුණු කිරීම බවත්, තම ප්‍රදේශයේ ආර්ථිකය දියුණු කිරීම වෙනුවෙන් එම වැඩසටහන් සමඟ සක්‍රීයව එක්වන ලෙසත් ඉල්ලා සිටියේය.
මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා මෙසේද පැවසීය,
අද ග්‍රාම නිලධාරීවරුන් ලෙස පත්වීම් ලබන ඔබ සියලුදෙනාට මම සුබ පතනවා. අද සිට ඔබ රාජ්‍ය සේවයේ සාර්ථක කොටස්කරුවන් බවට පත් වෙනවා. අප උත්සාහ කරන්නේ මේ රටේ සියලු ජනතාවගේ ජිවිත ගොඩනැංවීමටයි. එහි විශාල වගකීමක් රටේ මූලික පරිපාලන අංශය වන ග්‍රාම නිලධාරි කොට්ඨාසය ලෙස ඔබට පැවරෙනවා.
කඩා වැටීමට ලක්වූ මෙරට ආර්ථිකය අද සීග්‍රයෙන් දියුණු කිරීමේ වැඩපිළිවෙළ අප ක්‍රියාත්මක කර තිබෙනවා. ජාත්‍යන්තර මූල්‍ය අරමුදල සමඟ අප මේ වන විට ගිවිසුමකට එළැඹ තිබෙන අතර තවත් කොන්දේසි ගණනාවක් ක්‍රියාත්මක කිරීමට තිබෙනවා.
වත්මන් සංවර්ධන වැඩපිළිවෙළ ආරම්භ කර තිබෙන්නේ ගම කේන්ද්‍ර කර ගනිමිනුයි. පසුගිය 2022, 2023 වසරේ යල කන්නයේ සාර්ථක අස්වැන්නක් ලබා ගැනීමට අපට හැකි වුණා. ඒ වගේම 2023 වසරේ මහ කන්නයේදී නැවත සාර්ථක අස්වැන්නක් ලැබුණා. මෙම දායකත්වය නිසා අද අපට ආර්ථික වශයෙන් ශක්තිමත් වීමට හැකියාව ලැබී තිබෙනවා.
මේ සමඟ අද ග්‍රාම නිලධාරි සේවයට 2100ක් බදවා ගැනීමට අවශ්‍ය ප්‍රතිපාදන ලබාදීමට අපට අවස්ථාව ලැබුණා. පරිපාලන කටයුතු පමණක් නොවෙයි ග්‍රාමීය ආර්ථිකය දියුණු කිරීමේ වැඩපිළිවෙළේ වගකීමත් ඔබට පැවරෙනවා.
විශේෂයෙන් ප්‍රාදේශීය ලේකම්වරුන් සහ ග්‍රාම නිලධාරීන් එක්ව කටයුතු කළ යුතු අංශ 04ක් පිළිබඳව මම මෙහිදී පෙන්වා දීමට මම කැමතියි.
අඩු ආදායම් ලාභී ජනතාව නගාසිටුවීම වෙනුවෙන් රජය අස්වැසුම වැඩසටහන ක්‍රියාත්මක කර තිබෙනවා. සමෘද්ධිය මෙන් තුන් ගුණයක් වැඩිකර එම දීමනාව ලබා දීමට කටයුතු කර තිබෙනවා. එම ප්‍රතිලාභීන් පිළිබඳ තොරතුරු පරිගණක ගත කිරීම මේ වසර අවසන්වන විට නිමා කළ යුතුයි. එවිට ලබන වසරේ සිට මෙම වැඩසටහන මීට වඩා පහසුවෙන් ක්‍රියාත්මක කළ හැකි වෙනවා. ඒ අනුව අස්වැසුම මඟින් ගමට ලබාදෙන සහන ප්‍රමාණය වැඩි වී තිබෙනවා වගේම ප්‍රතිලාභීන් ප්‍රමාණය ඉහළ නැංවිමට අප තීරණය කර තිබෙනවා.
ඒ වගේම මෙම ජනතාවගේ ආදායම් මාර්ගද ඉහළ නැංවීමට කටයුතු කළයුතුයි. එම ආදායම්ද ගමේ ආර්ථිකයට එක් වෙනවා. ඒ වගේම අඩු ආදායම්ලාභීන්ට පසුගිය අලුත් අවුරුදු සමයේ මාස දෙකක් සහල් කිලෝ 10 බැගින් ලබා දීම ආරම්භ කළා. එමඟින් මෙම ජනතාවට තවත් සහනයක් ලැබෙනවා වගේම මෙම සහල් මිලදී ගනු ලැබුවේ කුඩා මෝල් හිමියන්ගෙන් බැවින් ඔවුන්ටද යම් සහනයක් ලැබී තිබෙනවා. මේ මුදල් සියල්ල හුවමාරු වන්නේ ගම තුළයි. ගම දියුණු කිරීමට නම් මෙම වැඩකටයුතු ඉදිරියට කරගෙන යා යුතුයි.
ඒ වගේම ජනතාවගේ සින්නක්කර ඉඩම් අයිතිය ලබාදීමේ වැඩපිළිවෙළ අප ආරම්භ කර තිබෙනවා. මෙම ඉඩම් අයිතිය සමඟ ඔවුන්ගේ ආර්ථිකයේ විශාල වෙනසක් සිදු වෙනවා. මෙම ප්‍රතිලාභය හිමිවන්නේ ද ගමටයි.
එසේම කෘෂි නවීකරණ වැඩසටහන හරහා ගමේ ආර්ථිකය ශක්තිමත් වෙනවා. අතීතයේ රජ රට ප්‍රදේශයේ කාෂිකර්මන්තයෙන් සශ්‍රීකව පැවතුණා. දඹදෙණියේ සිට මහනුවර දක්වා තෙත් කලාපයේ කුරුදු ඇතුළු කුළු බඩු වගා කෙරුණු අතර එහි අපනයන ආර්ථිකයක් පැවතුණා. බ්‍රිතාන්‍ය පාලන සමයේ තේ, රබර්, පොල් අපනයනය කළා.
නැවත රටේ ආර්ථිකය දියුණු කිරීමට නම් කෘෂිකර්මාන්තය දියුණු කළ යුතුයි. ඒ නිසා ප්‍රාදේශීය ලේකම් කොට්ඨාස මට්ටමින් මෙම වැඩකටයුතු ආරම්භ කිරීමට සැලසුම් කර තිබෙනවා. ගොවි ජන සේවා මධ්‍යස්ථාන මට්ටමින් කෘෂි නවීකරණ කමිටු පත් කර ගොවීන් ඒකරාශී කර ගනිමින් පුද්ගලික අංශයේ ද දායකත්වයෙන් ගමේ කෘෂිකර්මාන්තය නවීකරණය කිරීමේ වැඩපිළිවෙළ මේ වන විට අප ආරම්භ කර තිබෙනවා. දැනට ප්‍රාදේශීය ලේකම් කාර්යාල 25ක් මේ සඳහා හඳුනාගෙන තිබෙන අතර මිලියන 25 බැගින් ලබා දී තිබෙනවා. ඉදිරි වසර වන විට මේ සඳහා යොදා ගන්නා ප්‍රාදේශීය ලේකම් කොට්ඨාස සංඛ්‍යාව 100ක් බවට පත් කිරීමට අපේක්ෂා කරනවා.
ගමේ කෘෂිකර්මය දියුණු නොකොට ගමේ දුප්පත්කම නැති කරන්න බැහැ. එසේ නම් කෘෂි නවීකරණ වැඩසටහන සමඟ අප ඉදිරියට යා යුතුයි. දකුණේ ඇතැම් ප්‍රදේශ සංචාරක ව්‍යාපාරය නිසා දියුණු වී තිබෙනවා. මේ සියලු වැඩසටහන්වල අරමුණ ගමේ ආර්ථිකය නගා සිටුවීමයි. තමන්ගේ ප්‍රදේශයේ ආර්ථිකය දියුණු කිරීම වෙනුවෙන් ඔබ සියලුදෙනාද මෙම කටයුතු සඳහා සම්බන්ධ විය යුතුයි.
ඒ වගේම ග්‍රාමීය අධ්‍යාපනය සහ සෞඛ්‍ය දියුණු කිරීමේ වැඩපිළිවෙළ අප ආරම්භ කර තිබෙනවා. ඒ සඳහාද ඔබගේ සහභාගීත්වය අවශ්‍යයි.
උරුමය වැඩසටහනට අදාළ ඉඩම් ඔප්පු ලබාදීමේ කටයුතු කාර්යක්ෂම කිරීම සඳහා ජංගම සේවයක් ක්‍රියාත්මක කිරීමට අගමැතිතුමා ද සමඟ සාකච්ඡා කර අප සැලසුම් කර තිබෙනවා. ඒ අනුව ඉදිරි මාස දෙක තුළදි මෙම ඉඩම් ඔප්පු සියල්ල ලබාදී අවසන් කිරීමට බලාපොරොත්තු වෙනවා.
අග්‍රාමාත්‍ය දිනේෂ් ගුණවර්ධන මහතා,
රාජ්‍ය සේවය උතුම් සේවාවක්. රාජ්‍යයේ පැවැත්ම, දියුණුව හා සංවර්ධනය ආරක්‍ෂා කරගෙන ඉදිරියට යාමට රාජ්‍ය සේවකයන්ගේ කැපවීම, සුවිශේෂ වගකීමක් ලෙස සලකනවා. අන් සෑම සේවාවකටම වඩා රාජ්‍ය සේවය වැදගත්. අතීතයේ සිට ග්‍රාම නිලධාරි සේවාව උතුම් සේවාවක් ලෙස සැලකනවා. අද ග්‍රාම නිලධාරී වගකීම භාරගන්නා ඔබ සියලුදෙනා මේ බව ගැඹුරින් තේරුම් ගෙන කටයුතු කරනු ඇතැයි අප විශ්වාස කරනවා.
ක්ෂේත්‍රය තුළ වගකීම් ඉෂ්ට කරමින් සිට පසුව අමාත්‍යංශ ලේකම්වරු, අතිරේක ලේකම්වරු, දිසාපතිවරු ලෙස විසල් සේවාවක් ඉටුකළ ග්‍රාම නිලධාරීන් ගැන අපේ ඉතිහාස පොතේ ලියැවී තිබෙනවා.
මහා ගංවතුර වැනි අනපේක්ෂිත ලෙස ඇතිවන ස්වභාවික විපර්යාස වලදී පළමුවෙන් ජනතාව අතරට යන්නේ ඔබයි. එවැනි සිදුවිම්වලදී ග්‍රාම නිලධාරීන් මූලිකත්වය ගත්තා. එලෙස අවදියෙන් සිට කැපවීමෙන් කටයුතු කළ නිලධාරීන් අදත් සිටිනවා. එවැනි වගකීම් සමුදායක් ඔබට පැවරෙනවා. රාජකාරී ඉෂ්ට කිරීමේදී ඔබට තිබෙන වගකීම් සමුදාය ගැන ඉතාම ගැඹුරෙන් සිතන්න. රාජකාරියේ පරමාර්ථයන් හා අරමුණු ඔබ ඉෂ්ඨ කරයි කියන විශ්වාසය ඇතිවයි රජය අද මේ වගකිම් ඔබට පවරන්නේ.
2021 වසරේ ග්‍රාම සේවා පත්වීම් 2000ක් වෙනුවෙන් ඔබ සැම ඉල්ලුම්පත් ඉදිරිපත් කළා. එතැන් සිට දීර්ඝ කාලයක් ගත වුණත් ජනාධිපතිතුමාගේ ආශිර්වාදය හා අනුමැතියෙන් මුදල් අමාත්‍යංශයෙන් මූල්‍ය ප්‍රතිපාදන අනුමත කරගෙන, විභාගය පවත්වා එහි ප්‍රතිඵල මත පුරප්පාඩු සහිත ග්‍රාම නිලධාරී කොට්ඨාශවලට පත්වීම් ලබාදීමට රාජ්‍ය පරිපාලන අමාත්‍යංශයට හැකි වුණා.මේ පත්වීම් ලබාදී තිබෙන්නේ විභාගයෙන් සහ සම්මුඛ පරීක්ෂණ සමත් වූ, සුදුසුකම් සහිත අයටයි.
මේ පත්වීම් ප්‍රදානයේදී කිසිම අවස්ථාවක, කිසිම ලෙසකින් පක්ෂපාතීභාවයෙන් කටයුතු කර නැහැ. විභාග කොමසාරිස්රයා විසින් පවත්වන ලද විභාගයේ ප්‍රතිඵල අනුව කටයුතු කරන්න අපට පුළුවන් වුණා. එය ඔබ කෙරෙහි තබන විශ්වාසයයි. වගකීමෙන් ඔබේ රාජකාරිය ඉටු කරනු ඇතැයි අප විශ්වාස කරනවා.
ස්වදේශ කටයුතු රාජ්‍ය අමාත්‍ය අශෝක ප්‍රියන්ත මහතා,
වර්තමාන ජනාධිපති රනිල් වික්‍රමසිංහ, අගමැති දිනේෂ් ගුණවර්ධන යන මහත්වරු නොසිටින්නට ඔබට මේ පත්වීම් ලැබෙන්නේ නැහැ.
රාජ්‍ය පරිපාලනයේ ප්‍රධාන වගකීම් ඇතැමුන්ට අමතකයි. රාජ්‍ය නිලධාරින්ගේ ප්‍රධාන වගකීම විය යුත්තේ විධායකයේ රාජ්‍ය ප්‍රතිපත්ති ක්‍රියාත්මක කිරීමයි. රාජ්‍ය සේවකයාගේ වගකීම කැරලි ගැසීම නොවෙයි.
එදා කඩාවැටුණු රට ගොඩනැගීමට ජනාධිපති රනිල් වික්‍රමසිංහ මැතිතුමාගේ දේශපාලන නායකත්වය ඉවහල් වුණා. එතුමා අපට නිදහසේ ජීවත් විය හැකි පරිසරයක් නිර්මාණය කර දී තිබෙනවා. ජාත්‍යන්තර මූල්‍ය අරමුදලේ සහාය නොවන්නට මේ රට කඩා වැටෙන්න ඉඩ තිබුණා. එම නිසා රට ගොඩනැගීමේ රජයේ ක්‍රියාදාමයට ඔබ සැමගේ සහාය අවශ්‍යයි.
රටේ නීතිය ගමේ සිටින එක් පාර්ශවයකට දිය යුතු නැහැ. ඔබට මේ පත්වීම් ලබාදීමේදි අභියෝග රැසකට මුහුණ දීමට සිදු වුණා. ඔබේ සේවයට සරිලන වැටුපක් සහ වරප්‍රසාද ප්‍රමාණයක් ලබා දී තිබෙනවා. රාජ්‍ය පරිපාලනයේ වගකීම දරන සැබෑ රාජ්‍ය නිලධාරියාගේ වගකීම ඔබ සැම ඉටු කරනු ඇතැයි මම විශ්වාස කරනවා.
රාජ්‍ය පරිපාලනයට ව්‍යවස්ථාදායකය, විධායකය මගහැර ගමනක් යන්න බැහැ. විනාශකාරී දේශපාලනයෙන් බැහැරව රාජ්‍ය නිලධාරීන් කටයුතු කළ යුතුයි. රාජ්‍ය නිලධාරින් පෞද්ගලික න්‍යාය පත්‍රවලට අනුව කටයුතු නොකළ යුතුයි. රාජ්‍ය නිලධාරීන් වශයෙන් විධායකයේ තීන්දු තීරණ ක්‍රියාත්මක කිරීමට ඔබ බැඳී සිටිනවා.
ධීවර අමාත්‍ය ඩග්ලස් දේවානන්ද, ජල සම්පාදන සහ වතු යටිතල පහසුකම් සංවර්ධන අමාත්‍ය ජිවන් තොණ්ඩමන්, පළාත් සභා, පළාත් පාලන සහ පරිසර රාජ්‍ය අමාත්‍ය ජානක වක්කුඹුර, පාර්ලිමේන්තු මන්ත්‍රීවරුන් වන චමල් රාජපක්ෂ, එස්. බී. දිසානායක, බස්නාහිර පළාත් ආණ්ඩුකාර මාර්ෂල් ඔෆ් ද එයාෆෝස් රොෂාන් ගුණතිලක යන මහත්වරුන් ද අග්‍රාමාත්‍ය ලේකම් අනුර දිසානායක, රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යංශයේ ලේකම් ප්‍රදීප් යසරත්න, ස්වදේශ කටයුතු අමාත්‍යාංශයේ අතිරේක ලේකම් එච්. එම්. නන්දසේන යන මහත්වරු සහ දිස්ත්‍රික් ලේකම්වරුන්, ප්‍රදේශීය ලේකම්වරු ඇතුළු රාජ්‍ය නිලධාරීන් පිරිසක් මෙම අවස්ථාවට එක්ව සිටියහ.
