(කොළඹ | ලංකාපුවත්) – 13වැනි ආසියානු නෙට්බෝල් ශුරතාවයේ අවසන් තරගයෙන් ලකුණු 67- 64 ක් ලෙසින් සිංගප්පූරුවට පරාජයට පත්වීම නිසා අනුශූරතාවයෙන් සෑහීමට පත් වන්නට ශ්‍රී ලංකාවට සිදු විය.
ඒ අනුව ශූරතාවය සිංගප්පූරුවට හිමි වූ අතර සිංගප්පූරුව ආසියානු ශුරතාවයක් ජයගත්තේ සිව්වන වරටයි.
තරගයේ පළමු කාර්තුව වැඩියෙන් අතපසු කර ගත් ශ්‍රී ලංකාව 17-12 ක් ලෙස වැඩි ලකුණු පරතරයකින් පිටුපසට ගියද දෙවන කාර්තුවේ නැවතත් සුපුරුදු රිද්මය එක්කාසු කරගනිමින් 11-15 කින් දෙවන කාර්තුවේ දී ශ්‍රී ලංකාව ඉදිරියට එන්නට සමත් විය. එය එලෙසින්ම පවත්වා ගනිමින් තෙවන කාර්තුව ද ජයග්‍රාහීව නිමා කළ ශ්‍රී ලංකාව 11-15 ක් ලෙස එම කාර්තුව ද නිමා කරන්නට සමත් විය. නමුත් සිව්වන කාර්තුවේ නැවත් පසුපසට ගිය ශ්‍රී ලංකාව 13-10 ක් ලෙස නිමා කර ගැනීමත් සමග ලකුණු තත්ත්වය සටහන් වූයේ 52-52 ක් ලෙස සමවය.
ඉන් අනතුරුව ලබා දුන් අතිරේක කාලයේදී ලකුණු 67-64 කින් ශ්‍රී ලංකාවට පසුබසින්ට සිදුවිය. ශ්‍රී ලංකාවට අනුශුරතාවය හිමි වුවද ඉතා ආකර්ෂණීය තරගයක් ලබා දීමට හැකිවීම සැබවින්ම අගය කළ යුත්තකි.
තරගයෙන් අනතුරුව දිවයින හා සමබන්ධ වුණු ජාතික නෙට්බෝල් පුහුණුකාරිනී පී. ඩී. අයි. එන්. ප්‍රසාදි මහත්මිය සඳහන් කළේ ජයග්‍රහණය සඳහා උපරිමය කැප වුණත් අවසන් මොහොතේ එය අවාසනාවන්ත ලෙස ගිලිහුණ බවයි.
සිංගප්පූරුව ආසියානු ශූරතාවය සඳහා දීර්ඝ කාලීන ක්‍රමවත් සැලසුමකින් ක්‍රියා කළ බව සැවොම දන්නා කාරණයක් අතර ඔවුන්ගේ සහයට ඔවුන්ගේ බංකුවේ පුහුණු විශේඥවරියක් ලෙස ඕස්ට්‍ර්‍ර්ලියාවට ලෝක ශුරතාවය ගෙන දුන් පුහුණුකාරිණිය ජිල් මැකින්ටෝෂ් සිටීම සිංගප්පූරුවේ සැලසුම් වඩාත් සාර්ථක වන්නට හේතු වන්නට ඇති.
ශ්‍රී ලංකා නෙට්බෝල් සම්මේලනයවත් ක්‍රියාත්මක නොවන වපසරියක ක්‍රමවත් පුහුණු තරගාවලියක් හෝ නොලද ශ්‍රී ලංකා නෙට්බෝල් කණ්ඩායම පුහුණුකාරිණියගේ හයිය ඇතිව සමගින් කාර්තු හතර සිංගප්පූරුවට එරෙහිව සමව නිම කර ගැනීමත් ජයග්‍රහණයකි.
ශ්‍රී ලංකා කණ්ඩායම මුළු තරග කාලය පුරාම කිසිදු ආදේශනයක් නොකරමින් ක්‍රීඩා කළ අතර සිංගප්පූරුවේ ග්‍රහණයට වැඩියෙන්ම නතු වුණේ මැද පෙදෙසයි. තම හැකියාව ශරීර ප්‍රමාණයට අවප්‍රමාණය වන්නට නොදුන් ශ්‍රී ලංකා ආක්‍රමණය කරන්නිය රෂ්මි (GA) මනා සහයක් තිසාලාට (GS) ලබාදුණි. මල්මි (GD) හා ගයනි එකතුව (GK) සිංගප්පූරුවට එරෙහිව බැඳි පවුරට එකතු වු සුසීමා (WD) තරගය ජයග්‍රහණය කළත් සිංගප්පූරුවට හිසරදයක් වූවාට සැක නැත. නායිකා දුලංගි (WA) හා හිටපු නායිකා ගයංජලී (C) මැද කොටස මෙහෙයවු ද්විත්වය ය.
කෙසේ වෙතත් හත්වන වරටත් සිංගප්පූරුව ආසියානු ශුරතාවය ස්පර්ෂ කරන්නට තිබූ අවස්ථාව මග හැරුණි.
