(කොළඹ | ලංකාපුවත්) – මවුවරුන් හාරදහසක පමණ පිරිසකට වඳ සැත්කම් කරන ලදැයි කියන සිද්ධිය සම්බන්ධයෙන් කුරුණෑගල ශික්ෂණ රෝහලේ ජ්‍යෙෂ්ඨ ප්‍රසව හා නාරිවේද වෛද්‍ය ෂිහාබ්දීන් මොහොමඩ් ෂාෆි මහතා නීතිපති උපදෙස් ප්‍රකාරව නිදහස් කිරීමට කුරුණෑගල ප්රධාන මහේස්ත්‍රාත් බන්දුල ගුණරත්න මහතා ඊයේ (6) නියෝග කළේය.
සැකකරුට එරෙහිව මෙතෙක් විභාග වූ නඩුව තවදුරටත් පවත්වාගෙන යෑමට තරම් ප්‍රමාණවත් සාක්ෂි ඉදිරිපත් කිරීමට පැමිණිලිකාර පාර්ශ්වය අපොහොසත් වී ඇති බැවින් ඔහු එම චෝදනාවලින් නිදහස් කොට නඩුව නිෂ්ප්‍රභ කරන බව ද මහේස්ත්‍රාත්වරයා මෙහිදී ප්රකාශ කළේය.
ඒ අනුව සැකකාර වෛද්‍යවරයාට එරෙහිව පනවා තිබූ විදෙස් ගමන් තහනම ඉවත් කළ මහේස්ත්‍රාත්වරයා ඒ බව ආගමන විගමන පාලකවරයා වෙත ද දන්වා යැවීමට අධිකරණ රෙජිස්ට්‍රාර්වරයාට නියම කළේය.
මෙම සිද්ධියට අදාළව වසර පහකට අධික කාලයක් පැවති මහේස්ත්‍රාත් පරීක්ෂණයේ නියෝගය මහේස්ත්‍රාත්වරයා ප්‍රකාශයට පත් කරනු ලැබූ අවස්ථාවේදී මෙම කරුණු ඉදිරිපත් විණි.
මෙම සිද්ධියට අදාළව සැකකාර වෛද්‍යවරයාට එරෙහිව කුරුණෑගල ප්‍රදේශයේ කාන්තාවන් 768 දෙනකු පැමිණිලි ඉදිරිපත් කර තිබූ අතර, ඒ සම්බන්ධයෙන් අපරාධ පරීක්ෂණ දෙපාර්තමේන්තුව සිදු කරන ලද විමර්ශනයේදී වෛද්‍යවරුන්, හෙද නිලධාරීන්, පවුල් සෞඛ්‍ය සේවා නිලධාරීන්, රෝහලේ සුළු සේවක සේවිකාවන් ඇතුළු 138 දෙනකු පමණ පිරිසකගෙන් ප්රකාශ ලබාගෙන තිබූ බව අපරාධ පරික්ෂණ දෙපාර්තමේන්තුව අධිකරණයට කරුණු ඉදිරිපත් කර තිබිණි.
මෙම නඩුව අධිකරණය හමුවේ කැදැවූ අවස්ථාවකදී අපරාධ පරීක්ෂණ දෙපාර්තමේන්තුව කරුණු ඉදිරිපත් කරමින් සදහන් කර තිබුණේ සැකකාර වෛද්‍ය ෂියාබ්දීන් ෂාෆි ත්‍ර‍ස්තවාදී සංවිධානයකට සම්බන්ධ බවක් හෝ අයථා වත්කමක් ඉපැයූ බවක් හෝ මවුවරුන්ගේ පැලෝපීය නාල මිරිකූ බවක් හෝ සිදුකළ විමර්ශනවලින් අනාවරණය වී නොමැති බවය.
වෛද්‍ය ෂාෆි මහතා අත්අඩංගුවට ගැනීමේදී අක්‍ර‍මිකතා පවා සිදුවී ඇති බවට ද පසුගිය 2019 වසරේ ජූනි මස 27 වැනිදා අපරාධ පරික්ෂණ දෙපාර්තමේන්තුව කුරුණෑගල මහේස්ත්‍රාත් අධිකරණය හමුවේ කරුණු ඉදිරිපත් කර තිබිණි.
එහිදී අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේ මෙම වෛද්‍යවරයා සිංහල මවුවරුන් 3479ක්, මුස්ලිම් මවුවරුන් 860ක් සහ ද්‍ර‍විඩ මවුවරුන් 33ක් සිසේරියන් සැත්කම්වලට භාජනය කර ඇති බවය.
සැකකාර වෛද්‍යවරයාට එරෙහිව එල්ල කර තිබූ චෝදනා අනුව පැමිණිලිකාර මවුවරුන් සැබෑවටම සිසේරියන් සැත්කම් මඟින් වඳ භාවයට පත්ව ඇත්දැයි සෙවීමට කුරුණෑගල මහේස්ත්‍රාත් අධිකරණයේ නියෝග මත විශේෂඥ වෛද්‍යවරුන්ගෙන් සමන්විත කමිටු කිහිපයක්ම පත් කර තිබිණි. නමුත් එම පරීක්ෂක කමිටුවලින් සාර්ථක පරීක්ෂණ ක්‍රමවේදයක් සිදු නොවූ බවට අගතියට පත් පාර්ශ්වයෙන් චෝදනා එල්ල වූහ.
මෙම වෛද්‍යවරයාගේ සැත්කම්වලින් පසු ආසාත්මිකතා ඇති බවූ බව කියමින් රහස් පොලිසියට ලැබුණු පැමිණිලි 615ක් අතරින් පැමිණිලි 468ක් ගැන අධිකරණයට කරුණු වාර්තා කර ඇති බවත් ඒවා අතරින් විමර්ශන මට්ටමේ ඇති පැමිණිලි 147ක් අතරින් මවුවරුන් 13 දෙනකු විශේෂඥ කමිටුවට යොමු කළ බවත් අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබිණි. එමෙන්ම වෛද්‍ය පරීක්ෂණයට භාජනය කළ යුතු තත්ත්වයේ සිටියේ දෙදෙනකු පමණක් බවත් ඉතිරි පැමිණීලි 11ම අසත්‍ය ඒවා බවත් රහස් පොලිසිය අධිකරණයට කරුණු ඉදිරිපත් කර තිබිණි.
පැලෝපීය නාල ගැට ගසා හෝ තෙරපීම මඟින් සිසේරියන් සැත්කම් සිදු කරන අවස්ථාවේදී මවුවරුන් වඳ භාවයට පත්කර ඇතැයි යන චෝදනාවට අනුව එය සනාථ කර ගැනීමට අවශ්‍ය පැලෝපීය නාල පරික්ෂාවක් මෙරටේදී සිදුකළ නොහැකි බව පත් කරන ලද විශේෂඥ වෛද්‍යවරුන්ගේ මතය වූ බව අධිකරණයේදී කරුණු ඉදිරිපත් විණි. එවැනි පරික්ෂාවන් සඳහා අවශ්‍ය පහසුකම් මෙරට රෝහල් පද්ධතිය තුළ නොමැති බැවින් ඒ සඳහා පැමිණිලිකාර මවුවරුන් විශාල පිරිසකට අධික මුදලක් වැය කිරීමේ ගැටලුව ද ඇතිව තිබූ බව අධිකරණයේදී හෙළිවිණි.
වසර පහකට අධික කාලයක් කුරුණෑගල මහේස්ත්‍රාත් අධිකරණයේ පැවති මෙම නඩුවේ ඉදිරිපත් වූ කරුණුවල උධෘත නීතිපතිවරයා වෙත යොමු කළ අධිකරණය නීතිපතිවරයාගෙන් උපදෙස් ලැබෙනතෙක් නඩුකරය අධිකරණයේ විටින්විට කැඳවීම සිදු කළේය. ඒ අනුව නීතිපතිවරයා සිය නිගමනය ඉදිරිපත් කරමින් ඊයේ (06) සඳහන් කර තිබුණේ මෙම සැකකරුට එරෙහිව මින් ඉදිරියට නීතිමය පියවර ගැනීමට අදහස් නොකරන බැවින් ඔහු මෙම නඩුවෙන් නිදහස් කරන ලෙසට මහේස්ත්‍රාත්වරයාට දැනුම් දීමය. පසුගිය 2004 දී සීමාවාසික වෛද්‍යවරයකු ලෙස වෛද්‍ය වෘත්තියට පිවිසෙන සෙයිගු ෂියාබ්දීන් මොහොමඩ් සාෆි වෛද්‍ය වෘත්තියට පිවිස වසර 10කට පමණ පසුව 2015 වසරේදී පැවැත්වුණු පාර්ලිමේන්තු මැතිවරණයට එක්සත් ජාතික පක්ෂයේ අපේක්ෂකයකු ලෙස කුරුණෑගල දිස්ත්‍රික්කයෙන් තරග කළේය. එවකට පැවති එක්සත් ජාතික පක්ෂ රජයේ ප්‍රබල ඇමැති ධුරයක් දැරූ රිෂාඩ් බදූර්දීන්ගේ සමස්ත ලංකා මහජන කොංග්‍රස් පක්ෂය යටතේ ඔහු මැතිවරණයට තරග කළේය. නමුත් එම මැතිවරණයෙන් පාර්ලිමේන්තුව නියෝජනය කිරීමට ඔහුට අවස්ථාව හිමි නොවීය.
ඉන් පසුව සිදුවූ පාස්කු ප්‍රහාරය සම්බන්ධයෙන් රජය පරීක්ෂණ මෙහෙයවමින් සිටියදී ඒ ඔස්සේ ලැබී තිබූ තොරතුරු අනුව සැක කටයුතු ආකාරයට වත්කම් උපයාගෙන ඇතැයි යන චෝදනාව යටතේ ෂියාබ්දීන් සාෆි වෛද්‍යවරයා පසුගිය 2019 මැයි මස 24 වැනි දින කුරුණෑගල කොට්ඨාස අපරාධ විමර්ශන අංශය සැකපිට අත්අඩංගුවට ගනු ලැබීය.
එම චෝදනාවෙන් පසුව වෛද්‍ය සාෆිගෙන් කුරුණෑගල ශික්ෂණ රෝහලේදී සිසේරියන් සැත්කම් කරගත් බව කියන කාන්තාවෝ විශාල පිරිසක් ඔහුගේ සැත්කම් නිසා තමන් වඳ භාවයට පත්ව ඇතැයි පවසමින් පැමිණිලි ඉදිරිපත් කරන්නට වූහ.
ආරම්භයේදී කාන්තාවන් පස්දෙනකු වෛද්‍යවරයාට එරෙහිව චෝදනා කරමින් කුරුණෑගල ශික්ෂණ රෝහලට පැමිණිලි ඉදිරිපත් කර තිබූ අතර ඉන් පසුව කුරුණෑගල දිස්ත්‍රික්කයේ විවිධ ප්‍රදේශවල පදිංචි කාන්තාවෝ විශාල පිරිසක් කුරුණෑගල ශික්ෂණ රෝහලට පැමිණ ඔහුට විරුද්ධව පැමිණිලි ඉදිරිපත් කළහ. ඒ අනුව කාන්තාවන් දහසකට ආසන්න පිරිසක් වෛද්‍යවරයාට එරෙහිව පැමිණිලි ඉදිරිපත් කර තිබුණි. මේ හේතුවෙන් ඔහුගේ සේවය අත්හිටුවීමට ද සෞඛ්‍ය අමාත්‍යාංශය පියවර ගන්නා ලදි.
වෛද්‍ය සාෆි මහතා සම්බන්ධයෙන් විමර්ශනය කළ අපරාධ පරීක්ෂණ දෙපාර්තමේන්තුවට එම පරීක්ෂණය පිළිබඳ විස්තර අඩංගු පිටු 210ක වාර්තාවක් ද අධිකරණයට ඉදිරිපත් කර ඇත.
වෛද්‍යවරයාට එරෙහි නඩුව විභාග වන අතර කාලයේදී මාස හයකට ආසන්න කාලයක් ත්‍රස්තවාදය වැළැක්වීමේ පනත යටතේ රිමාන්ඩ් භාරයේ සිටි වෛද්‍යවරයා පසුව ඇප මත මුදා හරින ලදි. ඔහුට එල්ලවී තිබූ චෝදනා සොයා බැලීමට සෞඛ්‍ය අමාත්‍යාංශය පත් කරන ලද පරීක්ෂණ කමිටුවකින් ද ඔහු නිදොස් කරනු ලැබීය.
මේ හේතුවෙන් වෛද්‍ය ෂියාබ්දීන් සාෆි නැවත සේවයේ පිහිටුවීමෙන් අනතුරුව ඔහු යළි කුරුණෑගල ශික්ෂණ රෝහලේම රාජකාරි ආරම්භ කළේය. සේවය අත්හිටුවා තිබූ කාලය වෙනුවෙන් හිමිවූ ලක්ෂ ගණනක හිඟ වැටුප් මුදලක් ඔහු රෝහලේ සංවර්ධන කටයුතු වෙනුවෙන් පරිත්‍යාග කිරීම ද විශේෂ කරුණක් විය.
වසර 5කට අධික කාලයක් මෙම නඩුව විභාගයට ගැනුණි. අගතියට පත් පාර්ශ්වය වෙනුවෙන් ඉන්ද්‍රසිරි සේනාරත්න, නිලූෂි උයන්වත්ත, සමන් දිසානායක නීතිඥවරු නොමිලේ පෙනී සිටියහ. විත්තිකරු වෙනුවෙන් මෛත්‍රී ගුණරත්න, වසන්ත බණ්ඩාර යන ජනාධිපති නීතිඥවරුන් ද, ජයප්‍රේම බී. තෙන්නකෝන් නීතිඥවරයා ද පෙනී සිටියහ. නීතිපතිවරයා වෙනුවෙන් අපරාධ පරීක්ෂණ දෙපාර්තමේන්තුවේ ප්රධාන පොලිස් පරීක්ෂක මොහාන් සහ සැරයන් ඒකනායක පෙනී සිටියහ.
