(කොළඹ, ලංකාපුවත්) –ආණ්ඩුවේ අමාත්‍ය, රාජ්‍ය අමාත්‍ය සහ නියෝජ්‍ය අමාත්‍ය තනතුරු දරණ මැති ඇමතිවරුන් එම තනතුරුවලින් ඉවත්වීම දඩමීමා කරගනිමින් සිදුකරගෙන යනු ලබන අවස්ථාවාදී දේශපාලනය හෙළා දකින බව පාර්ලිමේන්තු මන්ත්‍රී කබීර් හෂීම් මහතා විශේෂ නිවේදනයක් නිකුත් කරමින් කියා සිටියි.
එම නිවේදනයේ පහත දැක්වේ.
පාස්කු ඉරුදින ප්‍රහාරයෙන් පසු රට තුළ ඇති වූ අවාසනාවන්ත තත්ත්වය සමනය වෙමින් පැවති මොහොතක 2019.06.03 වන දින උදෑසන සිට රට දැඩි අස්ථාවර මෙන්ම ගැටුම්කාරී මාවතකට ප්‍රවේශ කරවන අයුරු මාහට පෙනී ගියේය. එ අනුව ආණ්ඩුව නියෝජනය කළ මා ඇතුළු මුස්ලිම් මැති ඇමතිවරුන් රට ගැන සිතා සිය අමාත්‍ය ධුරවලින් ඉල්ලා අස්වීමට තීරණය කලේ ප්‍රධාන කරුණු 3ක් මුල් කරගනිමිනි.
1.පාස්කු ප්‍රහාරයත් සමග බිඳ වැටෙමින් පැවති ජාතීන් අතර අන්‍යෝන්‍ය සුහදත්වය රජයේ මැදිහත්වීම මත ක්‍රම ක්‍රමයෙන් ගොඩ නැගෙමින් පැවතිණි. එසේම ඉතා කෙටිකලක් තුළ රටෙහි ආරක‍ෂාව තහවුරු කිරීමට ආරක‍ෂක අංශ සමත්විය. තත්ත්වය මෙසේ තිබියදී හදිසියේම අන්තවාදී සීමිත පිරිසකගේ ක්‍රියා කලාපයන් හේතුවෙන් නැවතත් රට 1983 වසරේ සිදුවූවාක් මෙන් ජාතිවාදී කෝලාහලයක් වෙත තල්ලූවීමේ ලක‍ෂණ පහළකරන්නට විය. මේ තත්ත්වය දිගින් දිගටම වර්ධනය වූයේනම් අප මාතෘ භූමිය ජාත්‍යන්තරය ඉදිරියේ ද අපකීර්තියට පත්වීමට ඉඩ තිබිණි.
2.සුළුතර පිරිසකගේ එම ක්‍රියාකලාපය හේතුවෙන් සමස්ථ මුස්ලිම් ප්‍රජාවගේ දේපළ සහ ජීවිතාරක‍ෂාව වෙනුවෙන් පැවති තර්ජනය.
3.පාස්කු ප්‍රහාරය සම්බන්ධ පරීක‍ෂණවලට මුස්ලිම් දේශපාලනඥයන් බාධා කරන බවට එල්ල වූ චෝදනා
එබැවින් අමාත්‍ය ධුරයෙන් මා ඉල්ලා අස්වූයේ රටේ ආරක‍ෂාව තහවුරු කොට, ආර්ථීක කටයුතු යහපත්ව ඉදිරියට පවත්වාගෙන යෑමේත්, සාමාන්‍ය ජනතාවගේ එදිනෙදා කටයුතු බාධාවකින් තොරව පවත්වාගෙන යෑමේත් පරම පවිත්‍ර චේතනාවෙන් යුක්තවයි.
ඒ මගින් ආගම්වාදී, ජාතිවාදී දේශපාලනයක් ඉස්මතු කොට ඒ හරහා පටු දේශපාලන අරමුණු ඉටුකර ගැනීමේ චේතනාවක් මා තුළ නොවීය.
නමුත් මුහුණු පොතේ සහ සමහර මාධ්‍යවල පළවූ වාර්තා අනුව මේ අවස්ථාව දඩමීමා කරගනිමින් තමන්ගේ පටු දේශපාලන අරමුණු ඉටුකර ගැනීමට යමෙක් කටයුතු කරන්නේනම් එය මම දැඩි ලෙස හෙළා දකිමි. එවැනි නින්දිත දේශපාලනයකට කබීර් හෂීම් වන මාගේ කිසිදු එකඟතාවයක් හෝ සහයෝගයක් නැති බව තරයේ ප්‍රකාශ කර සිටිමි. එවැනි පටු අරමුණු පරාජය කිරීම සඳහා ජාතිමාමක බලවේග සමග එකට සිට ගැනීමට සූදානම් බව ද මේ මොහොතේ මම අවධාරණය කරමි.
එසේම ගරුතර මහානායක ස්වාමීන් වහන්සේලාගේ අනුශාසනයට හිස නමමින් උන්වහන්සේලාගේ උපදෙස් මත ඉදිරියේදීත් කටයුතු කිරීමට බැදී සිටින බවද ප්‍රකාශ කර සිටිමි.
