(කොළඹ | ලංකාපුවත්) – නව රජයේ කැබිනට් මණ්ඩලය හෙට (18) දිවුරුම් දීමට නියමිතව තිබේ.
ඒ අනුව ජනාධිපති ලේකම් කාර්යාලයේදී හෙට පෙරවරු 10.00ට ජනාධිපති අනුර කුමාර දිසානායක මහතා ඉදිරියේ නව කැබිනට් මණ්ඩලය දිවුරුම් දීමට නියමිත බව ජනාධිපති මාධ්‍ය අංශය සදහන් කරයි.
ඒ අනුව ජනාධිපති අනුර කුමාර දිසානායක මහතා විසින් 23 දෙනෙකුගෙන් සමන්විත කැබිනට් මණ්ඩලයක් හෙට (18) පත් කිරීමට නියමිත බව වාර්තා වේ. සියලුම කැබිනට් අමාත්‍යවරු සහ නියෝජ්‍ය අමාත්‍යවරු එම අවස්ථාවේදී දිවුරුම් දීමට අවශ්‍ය කටයුතු සූදානම් කර ඇත.
කෙසේවුවද, ආරක්ෂක හා මූල්‍ය අමාත්‍යාංශ තව දුරටත් ජනපතිවරයා අතේම තබා ගැනීමට තීන්දු වී ඇතැයි ද පැවසේ.
හරිනි අමරසූරිය නව රජයේ අගමැති ධුරයට පත්වනු ඇති අතර, අමාත්‍ය විජිත හේරත් විදේශ ඇමති ලෙස නැවත දිවුරුම් දෙනු ඇති බවද වාර්තා වේ.
මේ අතර, සියලුම අමාත්‍යංශ සඳහා නියෝජ්‍ය අමාත්‍යවරුන්ද පත් කිරීමට තීන්දු වී ඇතැයි පැවසේ.
අග්‍රාමාත්‍යවරියට අමතරව දකුණු පළාතෙන් තේරී පත්වූ වූ නව පාර්ලිමේන්තු මන්ත්රීවරියක් නව කැබිනට් මණ්ඩලයට ඇතුළත් කිරීමට නියමිත බවද මේ අතර වාර්තා වේ.
මෙම නව කැබිනට් මණ්ඩලයේ මංගල රැස්වීම ලබන අඟහරුවාදා පළමු පාර්ලිමේන්තු සැසිවාරයට පෙර පැවැත්වීමට ද සැලැසුම්කර ඇති බව පැවසේ.
