(ලංකාපුවත් | කොළඹ) – 2021 පහ වසර ශිෂ්‍යත්ව විභාගයට මුහුණ දෙන දූදරුවන් කිසිදු බියක් ඇති නොකරගෙන සැහැල්ලුවෙන් විභාගයට මුහුණ දෙන ලෙස විභාග කොමසාරිස් ජනරාල් එල්.එම්.ඩී. ධර්මසේන මහතා සදහන් කරයි.
විභාග කොමසාරිස් ජනරාල්වරයා රජයේ ප්‍රවෘත්ති දෙපාර්තමේන්තුවේ දී මේ බව ප්‍රකාශ කළේ, සෙනසුරාදා පැවැත්වීමට නියමිත පහ වසර ශිෂ්‍යත්ව විභාගය පිළිබඳව මාධ්‍ය දැනුවත් කිරීමේ සාකච්ඡාවකට අද (20) එක්වෙමිනි.
මෙවර ශිෂ්‍යත්ව විභාගය සුපුරුදු ලෙස ඉරිදා දින නොපැවැත්වෙන බවත් ජනවාරි 22 සෙනසුරාදා පෙ.ව 9.30ට විභාගය ආරම්භ වන බවත් විභාග කොමසාරිස් ජනරාල්වරයා පැවසීය.
විභාගය සඳහා සිංහල මාධ්‍යයෙන් දරුවන් 2,55,062ක්, දෙමළ මාධ්‍යයෙන් 85,446ක් පෙනී සිටින අතර සමස්ත සංඛ්‍යාව 3,40,508කි.
ඒ අනුව, විභාග මධ්‍යස්ථාන 2943ක් ක්‍රියාත්මක අතර කොවිඩ් -19 ආසාදිත දූ දරුවන් වෙනුවෙන් විශේෂ විභාග මධ්‍යස්ථාන 108ක් ක්‍රියාත්මක බවද විභාග කොමසාරිස් ජනරාල්වරයා පැවසීය.
