(කොළඹ | ලංකාපුවත්) – දෘශ්‍යාබාධිත දරුවන් සවිබල ගැන්වීම වෙනුවෙන් දෘශ්‍යාබාධිත පුද්ගලයින් වෙනුවෙන් නිෂ්පාදිත විශේෂිත බ්‍රේල් ලේබලයක් ඇතුළත් විශේෂිත පානීය ජල බෝතල් හදුන්වා දීමක් පසුගියදා ශ්‍රී ලංකාවේ සැමරූ ලෝක ළමා දින වැඩසටහනක දී සිදු විය.
කොළඹ විහාරමහාදේවී සතුටු උයන පරිශ්‍රයේ දී ඉකුත් 01වැනිදා ලෝක ළමා දිනය වෙනුවෙන් පැවැති සැමරුම් උත්සවයේ දී රත්මලාන අන්ධ විද්‍යාලයේ දරුවන් වෙනුවෙන් එම ජල බෝතල් භාර දීම සිදු විය.
කාගිල්ස් කිට්ස් සන්නමය යටතේ නකල්ස් පිරිසිදු පානීය වීදුරු ජලබෝතල් මෙහිදී බෙදා දීම සිදු විය.
මෙම ළමා දින සැමරුමේ විශේෂත්වය වූයේ රත්මලාන අන්ධ විද්‍යාලයේ දරුවන් ප්‍රධාන ආරාධිතයින් වීමය. අන්ධ විද්‍යාලයේ දරුවන් 80දෙනෙකු පමණ එහි විදුහල්පතිතුමිය සමග මේ අවස්ථාවට එක්ව ඔවුන්ගේ දක්‍ෂතාවයන් ඉදිරිපත් කළේය.
එසේම අඟහරුවාදා දවස පුරා පැවැති ළමා දින සැමරුම් වැඩසටහන සදහා බස්නාහිර පළාත ආවරණය වන පරිදි පෙර පාසල් 30කට අධික සංඛ්‍යාවක දරුවන් එක්වෙමින් ඔවුන්ගේ නිර්මාණශීලි කලා අංගයන් ඉදිරිපත් කළේය. කාගිල්ස් අනුග්‍රහයෙන් AN Entertainment සංවිධාන ශක්තියෙන් පැවැති මෙම ළමා දින වැඩසටහනේ දී විවිධ තරඟ ඉසව් රැසක් ද පොඩිත්තන් වෙනුවෙන් සංවිධාන කර තිබූ අතර දරුවන්ට දවස පුරා තෑගි දිනාගැනීමට අවස්ථාවන් රැසක් ද පැවැත්වුණි.
