(කොළඹ | ලංකාපුවත්) –සරම්ප රෝගය මාරාන්තික රෝගයක් වන නමුත් අදාළ එන්නත්කරණ ක්‍රියාවලිය සඳහා යොමු වීමෙන් එය පහසුවෙන් වළක්වා ගත හැකි බව සෞඛ්‍ය ප්‍රවර්ධන කාර්යාංශය පවසයි.
විශේෂඥ වෛද්‍ය චමල් සංජීව පෙන්වා දෙන්නේ මේ වනවිට දිස්ත්‍රික්ක 10ක පැතිර ඇති සරම්ප රෝගයේ දෙවැනි රැල්ලක් මතුවීමේ අවදානමක්ද පවතින බවයි.
ශ්වසන පද්ධතිය ආශ්‍රයෙන් මෙම වෛරසය ශරීරගතවීමෙන් යම් පුද්ලයෙකුගේ ප්‍රතිශක්ති පද්ධතිය දුර්වල වේ.
මෙම වෛරසය නිරෝගී පුද්ගලයෙකුගේ සිරුරට ඇතුළු වී සති දෙකක පමණ කාලයක් යන විට රෝගය වැළඳීම සිදු වන බව වාර්තා වේ.
තද උණ ගතිය, කැස්ස, සෙම්ප්‍රතිෂ්‍යාව, නාසයෙන් සොටුදියර ගැලීම සහ ඇස් රතුවීම සරම්ප රෝග ලක්ෂණ ලෙස හඳුනාගත හැකියෙ.
එක් සරම්ප රෝගියෙකුගෙන් සරම්ප එන්නත ලබා නොගත් නිරෝගී පුද්ගලයින් 18 දෙනෙකුට වෛරසය ආසාදනය වීමට හැකියාවක් පවති.
රෝගය වැළඳුණු අවස්ථාවේ මෙන්ම වසර ගණනකට පසුවත් සංකූලතා මතු විය හැකි බවයි සෞඛ්‍ය ප්‍රවර්ධන කාර්යාංශය පෙන්වා දෙයි.
මේ අතර කොළඹ රිජ්වේ ආර්යා ළමා රෝහලේ සරම්ප යැයි සැක සහිත රෝගී දරුවන් 15 දෙනෙකු මේ වන විට ප්‍රතිකාර ලබන අතර ඔවුන්ගෙන් 7 දෙනෙකු නිශ්චිත වශයෙන්ම සරම්ප රෝගීන් බවට අද වන විට තහවුරු කරගෙන තිබේ.
ඇතැම් පිරිස් ආගමික විශ්වාසයන් සහ ඇදහිලිවලට අනුව එන්නත්කරණ වැඩසටහන්වලට යොමුවීමේ මැලිකමක් දක්වන බවයි සෞඛ්‍ය අංශ පෙන්වා දෙයි.
