(කොළඹ | ලංකාපුවත්) – බන්ධනාගාර ගතව දඬුවම් ලබමින් සිටින රැඳවියන් 917 දෙනෙකුට සිංහල හා දෙමළ අලුත් අවුරුද්ද වෙනුවෙන් නිදහස ලබාදීමට නියමිතය.
ඒ අනුව පිරිමි සිරකරුවන් 896කට සහ කාන්තා රැඳෙවියන් 21 දෙනෙකුට අලුත් අවුරුද්ද වෙනුවෙන් විශේෂ රාජ්‍ය සමාව හිමිවන බව බන්ධනාගාර කොමසාරිස්(මාධ්‍ය ප්‍රකාශක) ගාමිණී බී දිසානායක මහතා පවසයි.
මෙම සමාවට සුදුසුකම් ලැබූ රැදවියන් අද පෙ.ව. 10.00 පමණ නිදහස් කිරීමට නියමිතව ඇත.
ජනාධිපතිවරයා හට ආණ්ඩුක්‍රම ව්‍යවස්ථාවේ 34 වන වගන්තියෙන් පැවරී ඇති බලතල අනුව බන්ධනාගාරගත සිරකරුවන්හට විශේෂ රාජ්‍ය සමාවක් ප්‍රදානය කර ඇත.
මේ අතර අලුත් අවුරුද්ද නිමිත්තෙන් බන්ධනාගාර රැඳවියන් බැලීමේ අවස්ථාව අද දිනයේදී ද ඥාතීන්ට ලබාදෙන අතර නිවසින් රැගෙන එන ආහාර ද ලබාදීමට හැකි වේ.
එහිදි රැඳවියන්ගේ ඥාතීන් විසින් නිවසින් රැගෙන එන ආහාර, රසකැවිලි හා සනීපාරක්ෂක ද්‍රව්‍ය ලබාදීමට හැකි බව බන්ධනාගාර දෙපාර්තමේන්තුව සඳහන් කළේය.
පවතින නීතිරීති හා නියමිත සෞඛ්‍යාරක්ෂිත ක්‍රමවේදයන් යටතේ අදාළ ද්‍රව්‍ය රැඳවියන් වෙත ලබාදීමට නියමිතය.
